Një ditë pas akuzave që kryeministri Edi Rama ka adresuar ndaj AKU-së, ka filluar ‘spastrimi’ i këtij institucioni.
Dy inspektorë të Autoritetit Kombëtar të Ushqimit të Korçës janë arrestuar nën akuzën e shpërdorimit të detyrës pasi kanë favorizuar një shtetas të kalonte nga Maqedonia në Shqipëri rrush industrial.
Të arrestuar janë Feridon Ibi, 55 vjeç dhe Dashamir Çaushi, 63 vjeç, inspektorë të AKU dhe Vangjel Teodor, 62 vjeç nga Pogradeci.
Sipas burimeve zyrtare të policisë Vangjel Teodor, u kap në flagrancë nga shërbimet e Policisë në aksin rrugor Qafë Thanë-Pogradec, duke transportuar me mjetin e tij tip furgon me targa PG 4046 B, një sasi prej 4600 kg rrush, të vendosur në 230 arka.
Nga verifikimet e kryera dyshohet se Teodor ka falsifikuar deklaratat e origjinës së mallit pasi ka bërë shmangien e një sasie prej 2300 kg të kësaj sasie, si edhe ka ndryshuar varietetin e këtij produkti në praktikën doganore, duke mos e deklaruar se shërbente për prodhim industrial.
Në vijim të këtij rasti, dy inspektorët e AKU-së, Feridon Ibi dhe Dashamir Çaushi, duke qenë të planizuar me shërbim pranë degës doganore Qafë-Thanë, dyshohet të kenë shpërdoruar detyrën, pasi kanë përpiluar një raport fito-sanitar duke tjetërsuar cilësinë e këtij produkti.
Në cilësinë e provës materiale u sekuestruan mjeti tip furgon dhe sasia e produktit.
a.ç
