Javanews/ Dokumentat e Panama Papers kanë nxjerrë emrin e Efraim Diverolit, personi që bleu miliona municione e fishekë nga Shqipëria për t’ja shitur amerikanëve në Irak e Afganistan. Zbulimi është bërë nga e përditshmja amerikane Miami Herald. Përmes një shkrimi të gjatë, gazeta shpjegon edhe lidhjen mes Diverolit, kompanisë së tij AEY, një trafikanti zvicerian dhe një firme offshore në Qipro.
Sipas Herald, në dokumentat e Panama Papers ka dalë emri i një qiprioti që quhej Charalambos “Pambos” Fellas. Fellas ishte drejtues i një kompanie të quajtur Evdin Ltd. Por siç shpjegon dhe Miami Herald, Fellas ishte thjesht një marionetë, ose i quajtur ndryshe një “drejtues nominal” i kompanisë. Madje, sipas dokumentave në Panama Papers, Fellas rezulton të jetë një drejtues nominal i rreth 30 kompanive offshore, të krijuara nga viti 2003-2007.
Pronari real i kompanisë “Evdin Ltd” ishte një tregtar i vjetër armësh, zviceriani Heinrich Thomet, i cili kishte njohje e kontakte me Diverolin dhe ortakun e tij Packouz.
Herald shkruan se kontrata që fituan dy të rinjtë (Diveroli dhe Packouz) me Pentagonin, përmes firmës së tyre AEY, erdhi falë ndihmës së zvicerianit Thomet dhe kompanisë së tij në Qipro “Evdin” që rezulton në Panama Papers.
Skema ishte e tillë
Armët dhe municionet në Shqipëri, të ardhura nga Kina dhe të mbetura aty që në kohën e komunizmit, do të bliheshin nga kompania “Evdin” në Qipro, e cila më pas do t’ja shiste kompanisë AEY të Diverolit. Vetë Diveroli i ripaketonte municionet dhe armët për shkak të embargos që ekzistonte në SHBA për municionet kineze.
Shkrimi i Miami Herald
Historia sesi 3 të rinj nga Miami Beach fituan miliona dollarë në kontrata armësh përmes Pentagonit është kthyer në një artikull të “Rolling Stone”, një libër e madje, së shpejti, në një film të Hollywood, të quajtur War Dogs.
Efraim Diveroli, David Packouz dhe Alexander Podrizki, shitën armë dhe municione të vjetra me origjinë kineze dhe nga ish blloku komunist, tek aleatët amerikanë në Irak dhe Afganistan,… teksa vetë thithnin shtëllunga epike cigaresh marijuane. Ata ishin në të njëzetat në atë kohë.
Tanimë, një tjetër personazh i kësaj drame, një qipriot i quajtur Charalambos “Pambos” Fellas, ka dalë në rrjedhjen massive të dokumentave, të disponuara nga Miami Herald dhe ICIJ. Dokumentat e papara ndonjëherë, të quajtura Panama Papers, vijnë nga Mossack Fonseca, një firmë ligjore panameze që krijonte kompani offshore për të pasurit dhe të pushtetshmit.
Qiprioti Fellas ka shërbyer si drejtuesi i një kompanie offshore në Qipro, e quajtur Evdin Ltd, e cila furnizonte dy dilerat e Miamit (Diverolin dhe Packouz)
Miami Herald kërkoi për emrin e Fellas në dokumentat e Mossack Fonseca dhe zbuloi se ai ka qenë një i ashtuquajtur “drejtues nominal” për të paktën 30 kompani offshore të krijuara ndërmjet viteve 2002-07. Të gjitha kompanitë ishin të bazuara në Seychelles, një parajsë fiskale afër Oqeanit Indian.
Ekspertët i quajnë kokat e këtyre korporatave si ajo e Fellas, “drejtues kukulla” dhe thonë se ato shërbejnë për pak gjë, përveçse për të mbajtur të fshehtë pronarin e vërtetë të kompanisë/ve.
Nuk ka fakte se Mossack Fonseca ka ngritur kompaninë Evdin Ltd në Qipro. Kompania nuk del në dokumentat e rrjedhura.
Por roli i Fellas në këtë skandal ilustron sesi anonimati i pronës së një kompanie mund të lejojë të bërit e gjërave të gabuara.
Është e qartë se ai po qëndronte për dikë tjetër: Pronari i vërtetë i “Evdin” ishte një tregtar svicerian armësh i quajtur Heinrich Thomet, sipas një hetimit të viti 2008 të Shtëpisë Amerikane të Përfaqësuesve (US House of Representatives)
Thomet ishte vënë në listën e personave nën vëzhgim nga ana e qeverisë së SHBA-ve për dyshime të trafikimit të armëve që në vitin 2006. Arsyeja për këtë listë të zezë ishte e klasifikuar nga ana e CIA-s.
Në një interviatq për Miami Herald, Packouz konfirmoi se Thomet (trafikanti zvicerian dhe pronari real i firmës qipriote Evdin*-shenim i përkthyesit) po përdorte kompaninë Evdin për ti shitur armë Diverolit dhe Packouz-it. Ai (Packouz) tha se së bashku me Diverollin e kishin takuar Thomet-in në një panair armësh në Las Vegas në vitin 2006, teksa ata sapo ishin duke u futur në lojën e shitjes së armëve (Familja e Diverolit punonte në industrinë e armëve)
“Ai kishte gjithe jetë që merej me tregti armësh” tha Packouz për Thomet. “Ai kishte lidhje kudo”
Vitin e ardhshëm kompania e dy të rinjve, AEY, fitoi kundër kompanive gjigande duke marrë për vete një kontratë 300 milionë dollarëshe me Pentagonin. Thomet, ishte ai që pranoi që të sillte porosinë masive që kërkoi më pas kompania AEY.
Skema e Thomet vuri në punë kompaninë qipriote Evdin, pasi sipas ligjeve të ishullit në mesdhe (Qipro), nuk ishte e nevojshme, që pronarët e një kompanie të jepnin emrat e tyre.
Evdin i ofroi tregarit zvicerian të armëve anonimitetin që atij i duhej, që të bënte biznes me qeverinë e Shteteve të Bashkuara. Shokët e tij të rinj në Miami Beach ishin ndërmjetësit.
Në 2007, Evdin bleu 100 milionë fishekë municione nga Shqipëria- fishekë që ishin importuar në vend nga Kina, dekada më përpara. Kjo sasi masive ju shit Diverolit, të cilit ju desh t’i ripaketonte në mënyrë që të fshinte origjinën e tyre.
Ka një embargo në SHBA për të tregtuar armë kineze. Prokurorët federal akuzuan Diverolin, Packouz-in dhe Podrizkin në vitin 2008 për mashtrimin e ripaketimit të municioneve.
