Qeveria ka miratuar një sërë ndryshimesh dhe shtesash në vendimin nr. 716 të vitit 2025, duke zgjeruar hartën e zonave që përfitojnë statusin për zhvillimin me përparësi të ekonomisë malore në Bashkinë Shijak. Akti i ri normativ, i propozuar nga Ministri i Shtetit për Pushtetin Vendor në mbështetje të ligjit “Për paketën e maleve”, integron territor të ri bujqësor e rural brenda kësaj skeme lehtësuese.
Ndryshimet e reja prekin drejtpërdrejt njësi administrative kyçe të Bashkisë Shijak, përfshirë Gjepalajn, Maminasin dhe Xhafzotajn, duke rikonfiguruar sipërfaqet ekzistuese dhe duke shtuar 11 zona të reja zhvillimore.
Sipërfaqet dhe fshatrat e përfshirë
Sipas vendimit të përditësuar, përveç rikufizimit të Zonës nr. 18 në fshatin Eminas i Vogël (me një sipërfaqe prej 46 hektarësh), harta e përparësisë ekonomike pasurohet me zonat nga nr. 21 deri në nr. 31:
Njësia Administrative Gjepalaj: Përfshihen fshatrat Likesh (Zona 21 me 101 ha dhe Zona 24 me 17 ha), Hardhishtë (Zona 22 me 19 ha), Eminas i Vogël (Zona 23 me 37 ha) dhe Shetël (Zona 25 me 53 ha).
Njësia Administrative Maminas: Përfshihen fshatrat Metallë (Zona 26 me 29 ha), Vlashaj (Zona 27 me 6 ha), Bodinak (Zona 28 me 83 ha) dhe Karreç (Zona 29 me 10 ha).
Njësia Administrative Xhafzotaj: Përfshihen fshatrat Rreth (Zona 30 me 52 ha) dhe Pjezë (Zona 31 me 20 ha).
Të gjitha këto sipërfaqe do të mbështeten mbi hartat treguese të sistemit të Infrastrukturës Kombëtare të Informacionit Gje hapësinor (KRGJSH), të cilat i bashkëlidhen zyrtarisht vendimit si pjesë përbërëse e tij.
Zbatimi i këtij akti nënligjor i është ngarkuar Ministrisë së Ekonomisë dhe Inovacionit, Agjencisë Shtetërore të Kadastrës si dhe vetë Bashkisë Shijak.
