OSHEE Group ka bërë publike bilancin e ri të zbatimit të skemave lehtësuese për shlyerjen e detyrimeve të prapambetura të energjisë elektrike, duke konfirmuar se deri më tani janë lidhur gjithsej 4,095 aktmarrëveshje (AKM) me Furnizuesin e Shërbimit Universal (FSHU). Nga kjo shifër totale, “2,818 klientë familjarë dhe jofamiljarë, ose 68.8% përfshirë bizneset dhe institucionet buxhetore dhe jobuxhetore, kanë shlyer të gjithë detyrimin me një këst të vetëm, duke përfituar reduktim të kamatëvonesës sipas kategorisë përkatëse”.
Të dhënat zyrtare tregojnë se në kategorinë familjare janë nënshkruar rreth 2,893 aktmarrëveshje, ku 965 abonentë kanë zgjedhur pagesën me këste, ndërsa 1,928 prej tyre i kanë likuiduar faturat e prapambetura me një këst të vetëm duke përfituar ulje me 70% të kamatëvonesës. Ndërkohë, 1,202 kontrata të tjera janë firmosur nga sektori jofamiljar dhe privat.
Kushtet për shtresat në nevojë dhe klientët familjarë
Skema e lehtësuar mbulon detyrimet e krijuara deri më 31 dhjetor 2024 për të gjithë abonentët, ndërsa për kategoritë vulnerabël — si familjet me ndihmë ekonomike, pensionistët kryefamiljarë dhe personat me status të veçantë — mundësia e aktmarrëveshjes shtrihet edhe për faturat e vitit 2025.
Sipas rregullave të vendosura, “këta klientë mund t’i shlyejnë detyrimet e krijuara deri më 31 dhjetor 2025, duke nisur nga një këst minimal prej 1200 lekësh në muaj, me kusht që të mos kenë detyrime të reja të pashlyera për vitin 2026”.
Për të garantuar përballueshmëri, numri maksimal i kësteve është caktuar deri në 240 muaj, me të drejtën e klientit për të zgjedhur një vlerë më të lartë mujore.
Skema sipas fashave për institucionet dhe bizneset
Për institucionet buxhetore, ato jobuxhetore dhe bizneset, numri i kësteve përcaktohet në mënyrë të shkallëzuar në varësi të vlerës së debisë së akumuluar deri në fund të vitit 2024, me kushtin strikt që subjektet të mos kenë krijuar debi të reja gjatë periudhës 2025–2026.
Fashat e kësteve ndahen si më poshtë:
24 këste për detyrimet nga 100,000 deri në 500,000 lekë;
48 këste për detyrimet nga 500,001 deri në 1,000,000 lekë;
60 këste për detyrimet nga 1,000,001 deri në 5,000,000 lekë;
84 këste për detyrimet nga 5,000,001 deri në 10,000,000 lekë;
120 këste për detyrimet administrative që kalojnë vlerën e 10,000,000 lekëve.
Për më tepër, kompania ka miratuar edhe një “skemë speciale” me deri në 24 këste për faturat korrektive, përmbledhëse e sistemuese, si dhe rastet e demontimit apo testimit të matësve.
Shkalla e faljes së kamatëvonesave
Lehtësimi më i madh financiar u ofrohet abonentëve që zgjedhin likuidimin e menjëhershëm të të gjithë detyrimit me një këst të vetëm. Në këtë rast, fashat e zbritjes së kamatëvonesës variojnë sipas profilrit të klientit:
Familjarët përfitojnë reduktim në masën 70% të kamatëvonesës;
Klientët jofamiljarë, buxhetorë dhe jobuxhetorë përfitojnë reduktim në masën 50%;
Biznesi i vogël përfiton “falje të plotë, 100%, të kamatëvonesës, nëse likuidon të gjithë detyrimin menjëherë”.
OSHEE Group nënvizon se këto masa synojnë t’u japin të gjitha kategorive të abonentëve një mundësi reale për të mbyllur përfundimisht faturat e prapambetura dhe për të lehtësuar barrën e tyre financiare.
