Të dënuarit dhe të paraburgosurit në sistemin shqiptar të burgjeve së shpejti do të shpërblehen edhe financiarisht për punën e kryer. Qeveria pritet të miratojë këtë pranverë rregullat, kriteret dhe procedurat e reja për punën në burgje. Ndryshimet do të shërbejnë si nxitje për t’u regjistruar në programet e punës dhe për të maksimizuar potencialin e të dënuarve për aftësim profesional dhe punësim.
Aktualisht, në burgje dhe paraburgime ka mesatarisht 658 persona të punësuar në muaj. Shpërblimi i punës së tyre realizohet përmes uljes së dënimit me 3.9 ditë në muaj dhe dhënia e një përfitimi monetar në masë minimale, 90 lekë në muaj, që depozitohet në llogarinë bankare të personit.
Institucionet për mbrojtjen e të drejtave të njeriut në vend, si Avokati i Popullit, kanë argumentuar prej vitesh nevojën për të ndryshuar mënyrën e shpërblimit, duke kërkuar që të zbatohen standardet europiane. Përafrimi i detyruar i legjislacionit shqiptar me atë të Bashkimit Europian duket se ka detyruar më në fund shtetin të bjerë dakord me kërkesat e shprehura.
Në relacionin për projektvendimet që do të miratohen gjatë vitit, të zbardhur nga SCAN, shprehet qartësisht se do të zbatohen standardet e BE duke siguruar shpërblim financiar për 600 të burgosur të punësuar në sistemin e burgjeve.
Legjislacioni europian përcakton qartë se shpërblimi i të dënuarve duhet llogaritur mbi bazën e pagës minimale në fuqi, orëve të punës dhe produktivitetit. Bonuse mund të jepen për ata individë që kanë produktivitet më të lartë.
Formula e saktë e llogaritjes së pagës për të burgosurit është ende për t’u përcaktuar nga qeveria. Mendohet gjithashtu të prezantohet edhe mundësia e punësimit përmes kontraktuesve privatë brenda apo jashtë institucione, të cilët do të paguajnë paga të plota normale në bazë të prodhimit të të burgosurve. Sipas skemave në fuqi, disa shtete zgjedhin që një pjesë e pagesës të mbahet për koston e mbajtjes së të burgosurit apo në rastet kur ai ka borxhe ndaj shtetit.
Në një raport mbi këtë çështje, Avokati i Popullit propozon që të burgosurve t’u lejohet që të shpenzojë të paktën një pjesë të fitimeve të tyre për artikuj që lejohen për t’u përdorur dhe për t’iu dhënë një pjesë të fitimeve të tyre familjeve të tyre apo për qëllime të tjera të miratuara. Sistemi mund të lejojë gjithashtu që një pjesë e fitimeve të mbahet mënjanë nga administrata, në mënyrë që të përbëjë një fond kursimi që t’i dorëzohet të burgosurit pas lirimit.
ma.me
