Ping-Pong mes qeverive për resortin turistik, projekti nisi në 2008
Saga e projektit për ndërtimin e një resorti turistik në Gjirin e Lalëzit ka nisur në korrik të vitit 2008, kur kryeministri i atëhershëm Sali Berisha priti në zyrën e tij përfaqësuesit e grupit “Omnix”.
Sipas njoftimit zyrtar të Kryeministrisë, të datës 7 korrik 2008, pasi u njoh me projektin e resortit, kryeministri e garantoi kompaninë për mbështetje maksimale.
Por hapat ligjorë për miratimin e projektit erdhën vetëm 5 vjet më vonë. Në maj të vitit 2013, në kulm të fushatës elektorale, qeveria në ikje e Sali Berishës miratoi lejen zhvillimore të projektit.
Por ndryshimi i qeverive dhe problemet e hasura në terren e lanë sërish projektin pezull. Projekti u riaktivizua sërish, por në një variant të ndryshuar.
Në 13 korrik të këtij viti, qeveria i kaloi kompanisë 28 hektarë tokë, të cilat u hoqën nga fondi pyjor, ndërsa dy javë më vonë Këshilli Kombëtar i Territorit miratoi lejen e ndërtimit.
Por, kur u duk se më në fund peripecitë dhe zvarritja burokratike e projektit morën fund, një vendim gjykate në mars e më pas dhunimi fizik i presidentit të kompanisë nga një grup personash, sollën tërheqjen e mënjehershme të saj nga Shqipëria dhe braktisjen e investimit.
Ministri i Drejtësisë, Ylli Manjani ka urdhëruar hapjen e një hetimi administrativ për vendimin e Gjykatës së Durrësit që i njohu pronën ku do të ndërtohej resorti turistik i Lalzit një familjeje nga durrësi.
Bëhet fjalë për vendin ku kompania “Omnix Albania” do të ndërtonte një kompleks gjigand turistik më vlerë 450 milionë dollarë. Deri para 6 muajsh, e gjithë sipërfaqja rezultonte pasuri e paluajtshme publike në regjistrat e shtetit.
Por më datë 25 mars të këtij viti, Gjykata e Durrësit, përkatësisht gjykatësja Johana Qeleshi ka dhënë vendim që 45 dynymë nga kjo sipërfaqe t’i njihet si pronë familjes Seçuni nga Durrësi.
Ky vendim duket se përbën një pikë të fortë kthese për rrjedhën e ngjarjeve dhe fatin e projektit më të madh turistik të parashikuar ndonjëhjerë në Shqipëri, pasi një ditë më parë “Omnix” deklaroi largimin nga vendi ynë.
Drejtoria e Inspektimit Gjyqësor do të hetojë të gjitha procedurat ligjore të ndjekura nga gjykatësja Qeleshi, për të parë nëse ky vendim është marrë konform ligjit apo jo.
Po kështu, inspektorët e Ministrisë së Drejtësisë do të kërkojnë zyrtarisht informacion nga zyrat e Regjistrimit të Pasurive dhe Agjencia e Trajtimit të Pronave për të parë historikun e kësaj prone.
/tch/a.k
