OBSH përgëzon shqiptarët: Masat që keni marrë janë mjeti më i fuqishëm ndaj COVID-19

Organizata Botërore e Shëndetësisë ka shpërndarë një mesazh inkurajues për mjekët dhe qytetarët shqiptarë.

OBSH shkruan se masat e qeverisë janë mjeti më efikas ndaj luftës me koronavirusin, ndaj duhen respektuar.

Institucioni në fjalë i përgjigjet edhe akuzave të PD, se nuk po kryhen testimet. Në deklaratë thuhet se vendimi për t’u testuar për COVID-19 duhet të bazohet në faktorë klinikë.

Mesazhi i plotë:

Në shpërthimin e tanishëm epidemik të COVID-19, Zyra e OBSh-së në Shqipëri dëshiron të shprehë vlerësimin dhe mirënjohjen ndaj punonjësve të Shëndetit në Shqipëri, për angazhimin dhe përkushtimin e tyre ndaj qytetarëve në këto kohë të vështira. OBSh-ja dëshiron gjithashtu të përgëzojë qytetarët shqiptarë për bashkëpunimin në zbatimin e masave të marra nga Qeveria për të siguruar distancimin shoqëror.

Këto masa janë tanimë mjeti më i fuqishëm që, të gjithë bashkë, kemi për të kapërcyer këtë krizë. Zyra e OBSh-së në Shqipëri po punon duke u koordinuar ngushtësisht me Ministria e Shëndetësisë dhe Mbrojtjes Sociale për të siguruar që vendimet e marra të jenë në përputhje me rekomandimet e OBSh-së.

Në këtë drejtim, ne duam të theksojmë se vendimi për t’u testuar për COVID-19 duhet të bazohet në faktorë klinikë dhe epidemiologjikë, dhe që janë të ndërlidhur me një vlerësim të mundësisë për t’u infektuar.

Testimi PCR i kontakteve asimptomatike ose lehtësisht simptomatike mund të konsiderohet në vlerësimin e individëve që kanë pasur kontakt me një rast COVID-19. Protokollet e depistimit duhet të përshtaten me situatën lokale.