Sipas tre zyrtarëve iranianë të njohur me planet e emergjencës së luftës, lideri suprem i Iranit, Ayatollah Ali Khamenei, tani kryen shumicën e bisedave me komandantët e tij përmes një ndihmësi të besuar, duke pezulluar komunikimet elektronike për ta bërë më të vështirë gjetjen e tij.
I strehuar në një bunker, Khamenei ka përzgjedhur një grup zëvendësuesish përgjatë zinxhirit të komandës ushtarake, në rast se disa nga bashkëpunëtorët e tij të afërt humbasin jetën, raporton New York Times.
Në një lëvizje të rrallë, ai madje ka emëruar tre klerikë të lartë si kandidatë për të marrë vendin e tij në rast vdekjeje, një tregues i qartë i momentit të vështirë që ai dhe sundimi i tij tre dekadash po përjetojnë.
Që kur Izraeli nisi sulmet e befasishme të premten e kaluar, Ayatollah Khamenei ka ndërmarrë një seri masash të jashtëzakonshme për të ruajtur Republikën Islamike.
Edhe pse sulmet izraelite kanë vetëm një javë që kanë nisur, ato përbëjnë sulmin më të madh ushtarak ndaj Iranit që nga lufta me Irakun në vitet 1980, dhe ndikimi në kryeqytetin Teheran ka qenë veçanërisht i ashpër.
Sulmet izraelite kanë qenë më të përqëndruara dhe kanë shkaktuar më shumë dëme në Teheran sesa lufta 8-vjeçare e Saddam Husseinit kundër Iranit.
Irani duket se ka kapërcyer tronditjen fillestare, duke u riorganizuar për të kryer kundërsulme të përditshme ndaj Izraelit, duke goditur një spital, rafinerinë e naftës në Haifa, objekte fetare dhe shtëpi.
Sipas zyrtarëve iranianë, të cilët kërkuan anonimitet për shkak të mungesës së autorizimit për të folur publikisht, autoritetet më të larta të Iranit po përgatiten në heshtje për një gamë të gjerë skenarësh teksa lufta intensifikohet, dhe Presidenti amerikan Donald Trump shqyrton mundësinë e përfshirjes në konflikt.
Edhe pse është e vështirë të kuptohet drejtimi i brendshëm i Iranit, zinxhiri i komandës duket se funksionon ende, edhe pse është goditur rëndë, dhe nuk ka shenja të dukshme pakënaqësie në radhët politike, sipas zyrtarëve dhe diplomatëve në Iran.
Khamenei, 86 vjeç, është i vetëdijshëm se Izraeli apo Shtetet e Bashkuara mund të tentojnë ta vrasin, një fund që ai do ta perceptonte si martirizim, thanë zyrtarët për NYT.
Për këtë arsye, ai ka marrë vendimin e pazakontë për të kërkuar nga Asambleja e Ekspertëve, organi përgjegjës për emërimin e liderit suprem, të zgjedhë shpejt pasardhësin nga tre emrat që ka propozuar vetë.
Normalisht, ky proces mund të zgjaste muaj me radhë, me klerikët që zgjedhin nga lista e tyre e kandidatëve, por në kohë lufte, Khamenei dëshiron një tranzicion të shpejtë dhe të rregullt për të ruajtur legjitimitetin e tij.
“Prioriteti kryesor është ruajtja e shtetit”, tha Vali Nasr, ekspert i Iranit dhe profesor i marrëdhënieve ndërkombëtare në Universitetin Johns Hopkins.
Çështja e pasardhësit ka qenë prej kohësh një temë shumë e ndjeshme dhe e diskutuar rrallë në publik, përveç spekulimeve dhe zërave në qarqet politike dhe fetare.
Lideri suprem mban pushtete të mëdha. Ai është komandanti i përgjithshëm i Forcave të Armatosura të Iranit, kreu i sistemit gjyqësor, legjislativ dhe ekzekutiv dhe gjithashtu Vali Faqih, përfaqësuesi më i lartë fetar i myslimanëve shiitë.
