Polonia dhe Portugalia do të përballen sonte në çerekfinalen e parë të “Euro 2016”. Ato kanë në gjirin e tyre dy nga yjet e këtij turneu.
Robert Lewandowski ka shënuar 50 gola në sezonin e fundit, në mes Bayern Munich dhe përfaqësueses së vendit të vet, por në finalet e këtij Europiani nuk është zhbllokuar ende. Edhe pse ka luajtur me kohë të plotë, 390 minuta, në finalet e Europianit të Francës, Lewandowski nuk është zhbllokuar si sulmues i Polonisë, ndërsa homologu i tij portugez ka shënuar dy herë, në barazimin 3-3 ndaj Hungarisë, që mjaftoi për të kaluar në 1/8 finale, shkruan Telesport.
Asistet flasin për sulmuesin polak, 6 të tilla, kundrejt 4 shërbimeve të sakta të CR7 për shokët e skuadrës. Më shumë faulla të pësuar regjistrohen ndaj Lewandowskit, 16, karshi 9 të tillë ndaj Ronaldos. Në foto-grafikun shoqërues të këtij shkrimi janë të paraqitura qartë të gjithë “numrat” e lojtarëve në fjalë, në sezonin e shkuar me klubet respektive, si dhe në “Euro 2016”, deri më tani, para përplasjes direkte./a.k
