Çmimi i energjisë elektrike për qytetarët nuk do të ndryshojë edhe për vitin 2026. Enti Rregullator i Energjisë ka vendosur të lë në fuqi fashën 700 kilovat të miratuar në fillim 2025.
“Fasha u miratuar në fillim të vitit 2025 për të lehtësuar barrën e pjesës më të madhe të konsumatorëve. Çmimi i energjisë për 2026 do mbetet i njëjtë si në 2025”, u shpreh eksperti Lorenc Gordani.
Eksperti Gordani shpjegon më në detaj tarifimin për abonentët familjarë për vitin 2026.
“Çmimi është 8.5 lekë pa TVSH dhe do të jetë për të gjithë konsumatorët që konsumojnë deri në 700 kilovat/orë në muaj. Konsumatorët që do e kalojnë këtë fashë, çmimi do të jetë 9.5 lekë pa TVSH”, tha ai.
Ulja mundësohet pas një ecurie pozitive të sistemit.
“Sistemi ka arritur një nivel përmirësimi të performancës së vetë, i cili bën dhe të mundur uljen e çmimit për konsumatorët për herë të parë pas shumë vitesh”, tha Gordani.
Sipas të dhënave zyrtare, mbi 1 milion familje në Shqipëri konsumojnë deri në 700 kilovat/orë në muaj dhe përfitojnë nga çmimi i reduktuar.
