Adriatik Lapaj zhvilloi sot protestën e radhës para Kryeministrisë, ku po qëndron prej 27 ditësh ditësh dhe netësh, duke kërkuar dorëheqjen e kryeministrit Edi Rama dhe rrëzimin e qeverisë.
Kreu i Lëvizjes “Shqipëria Bëhet”, akuzoi kreun e qeverisë për infektimin e shtetit me korrupsion dhe vjedhjen e taksave të qytetarëve, duke përmendur veçanërisht zëvendëskryeministren dhe ministren e Infrastrukturës dhe Energjisë, Belinda Balluku, e cila akuzohet për veprën penale të shkeljes së barazisë në tenderë.
“Erdhi për të zhbërë modelin e oligarkisë së Berishës, por nuk është zhbërë…jemi këtu për të kërkuar dorëheqjen e njeriut më të korruptuar në Europë. A ja dha populli 83 mandate që ta vjedhë? Ato mandate kanë zero vlerë sepse populli e di të vërtetën që ata na vjedhin. Ju këtu jeni njerëz të lirë, shqiptarët janë njerëz që meritojnë të jetojnë me dinjitet. Kemi 27 net që flemë në këtë shesh. Regjimi hajdut i Ramës nuk ka dërguar asnjë ambulancë…Për ata ne jemi njerëz që nuk duhet të ekzistojmë…Këta kanë blerë 10 mln euro çokollata, por buxheti kundër kancerit nuk është 10 mln euro në këtë vend. Me një firmë të zv/kryeministres kanë vjedhur 50 mln euro, ndërsa fëmijët në shkolla dridhen nga i ftohti”,- tha ai.
Gjatë fjalimeve, Lapaj dhe mbështetës të tij u përplasën me forcat e policisë, duke pretenduar se punonjës civilë të Policisë së Shtetit po filmonin protestuesit “me qëllim që t’i shoqëronin pas tubimit”.
Para godinës qeveritare, disa prej të pranishmëve në tubim montuan 2 stenda, që pritet të përdoren nga Lapaj dhe mbështetësit e tij për vazhduar “rezistencën” gjatë netëve të ftohta dhe me shi.
