Prej disa ditësh, fermerët në Greqi po vijojnë protestat në shenjë pakënaqësie ndaj politikave qeveritare dhe vështirësive ekonomike në sektorin bujqësor. Si pasojë, edhe këtë të shtunë, më 13 dhjetor, do të bllokohet aksi rrugor Kakavijë–Janinë.
Policia Kufitare Kakavijë njoftoi se, bazuar në informacionin e marrë nga Policia Kufitare Greke përmes qendrës së përbashkët të shkëmbimit të informacionit, bllokimi do të ndodhë në kryqëzimin e fshatit Kallpaq, nga ora 19:00 deri në orën 22:00, sipas orës greke.
Gjatë këtij intervali kohor, do të lejohet qarkullimi vetëm për automjetet që kanë emergjenca shëndetësore. Policia Kufitare Kakavijë u bën thirrje qytetarëve për mirëkuptim dhe këshillon planifikimin e udhëtimeve në orare të tjera të ditës.
Protestat e fermerëve kanë nisur prej javësh dhe pritet të kenë pjesëmarrje të gjerë. Sindikatat dhe koordinatorët lokalë janë angazhuar për të koordinuar aksionet protestuese në mbarë Greqinë, me qëllim kërkesën për politika më të favorshme për bujqësinë dhe përmirësimin e kushteve ekonomike për fermerët.
