Nëntë ditë pasi denoncoi në polici largimin nga shtëpia të dy prej fëmijëve të saj të birësuar, një shtetase amerikane me qëndrim në Shqipëri, përfundoi në qelitë e paraburgimit në zbatim të një vendimi gjykate, shkruan “Panorama”.
Andrea Grace Bailey-Kay, 47 vjeçe, dyshohet të ketë ushtruar dhunë ndaj dy të miturve. Ajo u arrestua më 5 qershor, pasi policia gjeti dy të miturit “e arratisur” nga banesa dhe dëgjoi rrëfimin e tyre se shkak i largimit kishte qenë dhuna e nënës birësuese.
Bazuar në këtë dyshim, Gjykata e Tiranës pranoi dje kërkesën e Prokurorisë për caktimin e masës së sigurisë “arrest në burg” ndaj saj për akuzën e “keqtrajtimit të të miturve”. Në sallën e gjyqit, e dyshuara 47-vjeçare, nënë e 8 fëmijëve, nga të cilët gjashtë të birësuar, tha se nuk kishte ushtruar dhunë ndaj fëmijëve të saj dhe kërkoi lirimin e saj nga qelia.
“Unë i kam birësuar dy djemtë për shkak se nëna e tyre kishte probleme me drogën. Nuk është e vërtetë pretendimi i tyre për dhunë. Unë jam kujdesur për ta”, mësohet të jetë shprehur e dyshuara në sallën e gjyqit.
Në lidhje me disa shenja dëmtimesh në trup, 47-vjeçarja ka pohuar se ato mund t’u jenë shkaktuar nga përplasjet e tyre në kazanët e plehrave gjatë ditëve të “arratisë” nga shtëpia.
Ky pretendim i amerikanes është kundërshtuar nga përfaqësuesi i prokurorisë në sallën e gjyqit, prokurori Julian Zonja. Duke iu referuar deklarimeve të dhëna nga dy fëmijët e mitur të të dyshuarës, në praninë e një psikologeje, prokurori i ka thënë gjyqtares së gatshme se prej kohësh 47- vjeçarja ka ushtruar dhunë ndaj të vegjëlve.
Gati një javë pas largimit të tyre nga shtëpia, në momentin që janë gjetur nga policia, dy të miturit kanë refuzuar kthimin në banesë. Ata u kanë thënë oficerëve të Policisë Gjyqësore se ishin larguar nga shtëpia për shkak të dhunës fizike që ushtronte 47-vjeçarja ndaj tyre.
Tjetër provë e paraqitur nga prokuroria kanë qenë raporte të Mjekësisë Ligjore, nga të cilat janë konstatuar dëmtime në trupin e të miturve. Sipas Prokurorisë, ka dyshime se dëmtimet mund të jenë shkaktuar nga goditje me rrip në trup. Pasi është njohur me pretendimet e të dyja palëve, Gjykata i ka vlerësuar të bazuara dyshimet e ngritura nga prokurori dhe caktoi masën e sigurisë “arrest në burg” për shtetasen amerikane Andrea Grace Bailey-Kay.
