Emisioni investigativ fiks fare transmetoi sot një episod nga gara në Dibër. Për shumëkënd që jeton në Shqipëri, episodi në fjalë duket normal. Një individ i paguar nga një televizion privat i kërkon shtabit elektoral të PS favore në këmbim të votës. Koordinatori i PS qartësisht i thotë aktorit të “Fiks Fare” se para në këmbim të votës nuk bëhet fjalë të ofrohen. Por më pas, palët flasin për mundësinë e punësimit pas përfundimit të zgjedhjeve.
Sigurisht që koordinatori i PS nëse do banonte në Suedi, Danimarke apo Norvegji, do të duhet ta kishte denoncuar në polici aktorin e “Fiks Fare”. Por në jetojmë në Shqipëri. Dhe në Shqipërinë tonë, është e vështirë që shtabet elektoral të partive të përzënë votues që ofrohen për të mbështetur një kandidat. E në këtë rast, duke i ofruar aktorit të Fiksit mundësinë për të folur për ndonjë vend pune në përfundim të zgjedhjeve, koordinatori i PS-së ka përcjellë me lezet të interesuarin.
Deri këtu, çdo gjë është brenda normalitetit shqiptar.
Por ajo ç’ka është për të ardhur keq është fakti se pikërisht ky rast i transmetuar nga Fiks Fare, i heq mundësinë PD-së për të parë në sy realitetin e hidhur ku gjendet.
Kandidati i PD humbi thellë në zgjedhje. Distanca nga fituesi i PS ishte 14%, ose mbi 4 mijë vota. Një humbje aq e thellë sa nuk mund të justifikohet as me thasë mielli, as me para, as me mundësi punësimi. Nëse PS-ja do kishte punësuar 4 mijë dibranë në këmbim të votës së tyre, problemi i papunësisë në Dibër sot do të ishte i zgjidhur.
Ndaj, PD dhe Lulzim Basha bëjnë mirë të shohin të vërtetën në sy, të kuptojnë arsyet e vërteta të kësaj humbje të thellë e të mos gjejnë justifikime si kamera e fshehte e Fiksit, e cila sigurisht që tregon realitetin shqiptar, por kurrsesi nuk shpëton dot Lulin dhe ca të tjerë nga hidhërimi i kësaj humbje të thellë./Lexo.al
