Antoneta Sevdari është rikthyer në Këshillin e Lartë të Prokurorisë, duke u zgjedhur sot një nga anëtaret e KLP-së nga radhët e Prokurorisë së Përgjithshme.
Në mbledhjen që po mbahet sot në ambientet e Polit të Drejtësisë, u zgjodhën edhe dy anëtaret e tjera Afërdita Ndoi dhe Eloida Goxhi.
Kujtojmë se Sevdari është magjistratja e parë në Shqipëri që rikthehet në sistemin e drejtësisë pas përmbysjes së një vendimi të formës së prerë të vetingut, në një betejë që ajo e fitoi nga Gjykata Evropiane e Drejtave të Njeriut, në Strasburg.
Këto tre anëtare të Këshillit të Lartë të Prokurorisë (KLP), nga radhët e prokurorisë, që do të zëvendësojë anëtarin Sokol Stojani, përfaqësues i Prokurorisë së Përgjithshme; Ledina Riza, përfaqësuese e prokurorive të apelit; dhe Zeqir Hoda, përfaqësues i prokurorive të shkallës së parë përfunduan mandatet.
Ky proces i sotëm është mjaft i rëndësishëm, në një kohë kur ka ngecur procesi për vlerësimin e pesë kandidatëve për prokuror të Përgjithshëm.
Procesi për zgjedhjen e Prokurorit të Përgjithshëm u zhbllokua më 8 tetor 2026, pasi Këshilli i Lartë i Prokurorisë (KLP) rrëzoi me shumicë votash kërkesat e ndërsjella të kandidatëve për përjashtimin e anëtarëve të KLP-së nga vendimmarrja.
Në garë për këtë post janë pesë kandidatë:
-Adnan Xholi (prokuror i SPAK)
-Arta Marku (ish-Prokurore e Përgjithshme e Përkohshme)
-Fatjona Memçaj (prokurore në Eurojust)
-Rovena Zoto (prokurore në Tiranë)
-Ylli Pjetërnikaj (pedagog dhe prokuror)
Procesi kishte ngecur për disa javë për shkak të një zinxhiri kërkesash për përjashtim të anëtarëve të KLP-së (të iniciuara fillimisht nga kandidati Ylli Pjetërnikaj ndaj anëtarit Vatë Staka dhe më pas kërkesa të tjera të ngjashme mes anëtarëve).
