Një 39vjeçar është dënuar me gjobë nga Gjykata e Tiranës për dhunimin e një mjeku në krye të detyrës. I pandehuri Zabit Mena e ka mbërthyer mjekun për fyti, e ka qëlluar në kokë, si dhe ka kërcënuar personat e tjerë që ndodheshin në qendrën shëndetësore. Ngjarja ka ndodhur më 2 qershor 2015, në Qendrën Shëndetësore Bathore, Tiranë. I akuzuari Mema është shpallur fajtor për akuzën e “goditjes për shkak të detyrës” në dëm të mjekut Shemsi K. Mena u dënua me 140 mijë lekë gjobë, të cilat duhet t’i shlyejë brenda një viti, pasi vendimi të marrë formë të prerë.
Referuar vendimit, konflikti ka marrë shkak nga vajtja e bashkëshortes së Menës për të vaksinuar fëmijën e mitur në Qendrën Shëndetësore në Bathore. Mjeku Shemsi K. i ka thënë se këtë shërbim ajo duhet ta merrte pranë mjekut të familjes, ku ishte regjistruar. Megjithatë mjeku e ka vizituar fëmijën dhe i ka thënë një infermiereje të vijonte me vaksinimin. Në këto momente, bashkëshortja e Zabitit, pasi ka folur në telefon me të shoqin, është larguar. Pas kësaj i pandehuri është lidhur me mjekun në telefon, duke i thënë se nuk do ta bënte vaksinën e fëmijës tek ai. Por ai i ka kërkuar një letër ku të shënohej se mjeku nuk ia jepte vaksinën fëmijës së tij. Të nesërmen, rreth orës 09:00, i pandehuri ka shkuar vetë në qendrën shëndetësore. Ai ka gjetur mjekun dhe i ka kërkuar atij shkresën në fjalë. Pak minuta më vonë, ai i ka ripërsëritur kërkesën dhe e ka tërhequr të dëmtuarin nga karrigia ku ishte ulur.
Me gjithë kundërshtimin e bluzës së bardhë, i pandehuri i ka marrë atij telefonin nga duart. Më pas ka debatuar me doktorin dhe i ka thënë të dilnin jashtë. Sipas vendimit të gjykatës, mjeku nuk ka dalë, por i pandehuri e ka kapur në fyt me duar dhe e ka goditur në kokë dhe kanë vazhduar të përleshen me njëritjetrin. Skena është parë nga një infermiere, e cila ka tentuar të dalë jashtë për të kërkuar ndihmë. “Do t’ju vras të gjithëve”, ka thënë i pandehuri Mena dhe është larguar. Sipas vendimit, i pandehuri kishte pasur dhe disa “gërricje” të mëparshme me mjekun në lidhje me analizat mjekësore të nënës së tij. Gjatë gjykimit, i pandehuri ka pranuar akuzën dhe fajësinë, duke pohuar se sherri ka ndodhur nga gjendja momentale e tij dhe rrethanave.
