Novak Gjokoviç ka kaluar pjesën më të madhe të kohës në katër vitet e fundit si tenisti numër një në botë, mirëpo ai nuk është kampioni i njerëzve. Pasi që më në fund ka tejkaluar superyllin Roger Federer dhe rivalin e tij të përhershëm, spanjollin Rafael Nadal, Gjokoviç e di se tifozëria jo gjithmonë është në anën e tij. Mirëpo kjo vetëm sa e ka forcuar atë.
Gjatë turneut Rogers Cup të muajit të kaluar në Montreal, ai doli në dhomën e medieve në stadiumin “Uniprix”. Ai ishte përkrah agjentes Elena Cappellaros dhe një gazetari për ATP Tour. Për një sportist të gjatë 188 centimetra, Gjokoviç duket mjaft i lehtë.
Në librin e tij, “Serve to Ëin” (Shërbim për të fituar), ai shkroi se si ka rënë nga 83 kilogramë në 78 kilogramë që kur ka nisur një dietë pa gluten, duke bërë që familja e tij dhe shokët të brengoseshin se po bëhet tepër thatanik. Mirëpo ai, megjithëse në peshë të dobët, është mjaft i fuqishëm.
“Në fillim të karrierës më kishin parë si rebel, si një person që vjen në kombinim dhe nis të sfidojë dy të parët. Pyesnin: ‘Cili është ai djalosh nga Serbia, një vend i vogël, që vjen nga asgjëja dhe nis të thotë se mund të mposhtë më të mirët dhe të bëhet numër një në botë?’ Qartë se e kuptoj reagimin e njerëzve ndaj kësaj, por jam ndier se mënyra e vetme për të dalë aty ka qenë për të treguar se meritoj të jem aty”, thotë Gjokoviç, tashmë 28-vjeçar.
Gjokoviç insiston se ai kurrë nuk ka treguar mosrespekt ndaj kundërshtarëve të tij apo ndaj sportit.
“Unë mundohem ti përgëzoj ata, t’i kuptoj, pasi pak e shumë jemi në të njëjtën situatë. Për shkak të Nadalit dhe Federerit jam bërë tenist më i mirë dhe jam bërë ai që jam sot. Por është dashur të meritoj këtë dhe ende duhet ta meritoj. Unë ende nuk jam aty, në nivelin e vlerësimit që kanë Nadali e Federer dhe e kanë të merituar, pasi ishin aq dominues”, ka thënë Gjokoviç. “Ata janë kampionë si në fushë ashtu edhe jashtë saj. Mirëpo kjo vetëm sa më motivon për të vazhduar më tepër”.
Që nuk e ka përkrahjen e publikut Gjokoviç e vërejti edhe në finalen e Grand Slamit “US Open” kur u përball me zviceranin Federer. Pjesa më e madhe e tifozërisë ishte në përkrahje të Federerit. Gjokoviç fitoi me 3:1 në sete dhe për të ishte Grand Slami i dhjetë i fituar në karrierë dhe i treti këtë vit. Pas ndeshjes ai pranoi se ende duhet të punojë për të fituar zemrat e tifozëve.
