Autoriteti norvegjez për mbrojtjen e të dhënave njoftoi të hënën se ka ndëshkuar Xandr, kompaninë e teknologjisë reklamuese nën pronësinë e Microsoft, me 92 milionë korona norvegjeze (9.6 milionë dollarë) për shpërndarje të paligjshme të informacioneve personale të ndjeshme.
Sipas transmetuesit publik NRK, ky është dënimi financiar më i rëndë i shqiptuar deri më tani nga Autoriteti Norvegjez i Mbrojtjes së të Dhënave.
Dyshohet se kompania u ka kaluar të dhëna personale mijëra firmave përmes sistemeve të ankandeve reklamuese në kohë reale, të cilat shërbejnë për shfaqjen e reklamave të personalizuara.
“Mijëra qytetarë norvegjezë kanë qenë të ekspozuar ndaj ndarjes së paligjshme të informacioneve të ndjeshme,” deklaroi Line Coll, drejtoresha e Autoritetit Norvegjez për Mbrojtjen e të Dhënave.
Ajo i cilësoi shkeljet si “tejet të rënda” dhe theksoi se serioziteti i tyre e bënte të domosdoshëm një dënim financiar kaq të lartë.
Në një reagim dërguar NRK-së, një përfaqësues i Microsoft u shpreh se siguria e privatësisë së përdoruesve mbetet një ndër prioritetet kryesore të kompanisë.
Ai shtoi gjithashtu se hetimi dhe vendimi lidhen me veprimtari që datojnë përpara se Microsoft të blinte Xandr, dhe se kuadri rregullator dhe praktikat e zbatimit kanë ndryshuar që nga ajo kohë.
Kompania bëri të ditur se po e shqyrton me kujdes vendimin dhe po analizon të gjitha alternativat e mundshme./ AA.
