Ish-deputeti i Partisë Demokratike Ervin Salianji ka publikuar një shkrim të shkurtër në profilin e tij në rrjete sociale, një vit pas lirimit të tij nga qelia e burgut.
Salianji e cilëson dënimin e tij si burgosje politike, ndërsa shton se pushteti që ia kufizoi përkohësisht lirinë, nuk arriti t’ia ndryshonte bindjet e idealet.
“Sot, një vit liri. Një vit më parë mori fund sprova e burgosjes politike. E sanksionuar si e tillë nga 6 rezoluta ndërkombëtare! Pushteti mund të shtrëngojë, mund të kufizojë përkohësisht lirinë e një njeriu, por nuk mund të burgosë kurrë bindjet, të vërtetën dhe idealet që ai ka.Përherë kam zgjedhur të mos ndryshoj bindjet për t’iu përshtatur rrethanave. Sepse liria nuk është privilegj që të jepet nga pushteti; është e drejtë që mbrohet çdo ditë”, shkruan Salianji.
Ndër të tjera, Salianji shkruan se Shqipëria ka nevojë për demokraci, për institucione që si bazë kanë ligjin dhe për një politikë që pranon mendimin ndryshe.
“Shqipëria ka nevojë për institucione që respektojnë ligjin, për politikë që pranon mendimin ndryshe dhe për qytetarë që nuk heqin dorë nga e drejta për të kërkuar më shumë demokraci, më shumë drejtësi dhe më shumë llogaridhënie.
Një vit më vonë, bindja ime është edhe më e fortë: pengesat mund ta vonojnë rrugën, por nuk e ndryshojnë drejtimin”, shkruan Salianji.
Ervin Salianji u dënua me 1 burg në shtator 2024 për kallëzim të rremë, si fabrikues i dosjes “Babalja”. Pas 9 muajve qëndrim në qeli, Gjykata e Fierit i pranoi kërkesën për lirim me kusht. Me dënimin me 1 vit burg, Ervin Salianji humbi mandatin e deputetit në Kuvendin e Shqipërisë, ku ishte zgjedhur në zgjedhjet e 2017-s dhe 2021-shit për 2 legjislatura. Sipas ligjit të dekriminalizimit ai nuk mund të zgjidhet në funksione publike për të paktën 5 vite pas mbylljes së dënimit, pra deri në vitin 2030 kur konsiderohet i rehabilituar.
