Nga Skënder Minxhozi/
Një fqinj i moshuar ndjehet keq duke ecur me biçikletë në rrugë. Gjithçka ndodh shpejt dhe plaku i gjorë e sheh veten të shtrirë në asfalt. Mblidhen menjëherë njerëz, shumë prej të cilëve kuriozë që hapin sytë për të parë ç’po ndodh. Plaku shoqërohet në spital, merr ndihmën dhe këtu mbyllet gjithçka.
Kjo ngjarje ka ndodhur sot në një nga rrugët e Tiranës, kur 68 vjeçari Avgur Topalli është rrëzuar nga biçikleta rreth orës katër, pasi është ndjerë jo mirë. Kështu lexohet në të gjitha mediat. S’do ta kishim marrë vesh fare këtë ndodhi krejt banale që i ka ndodhur shumëkujt, më shumë se një herë në jetë, me veten, të afërmit apo të njohurit. Por ja që kur ta jep ndihmën e parë një anëtar i qeverisë, edhe një jo-lajm kthehet në lajm. Madje i vlefshëm për në faqe të parë.
Klajda Gjosha ka bërë një gjest human, kur ka ndalur makinën për t’i dhënë fqinjit të saj Avgur Topalli. Por këtu s’ka asnjë lajm. Sepse pyetja më naive e botës që lind në një rrethanë të tillë është: Cili nuk do të ndalonte, teksa sheh një fqinj të moshuar që rrëzohet nga biçikleta? A mos duhet të jesh patjetër ministër, që të ndalësh hapin apo automjetin? Me siguri që të dyja pyetjet marrin të njëjtën përgjigje: Nuk ka nevojë të jesh anëtar qeverie, për të ndihmuar komshiun e vjetër që shtrihet në rrugë. Për pasojë, nuk ka as lajm.
Ky vend prodhon shumë jo-lajme, bashkë me lajmet. Të dyja kategoritë i gjejmë të rrasura në faqet e gazetave dhe kuadratet e portaleve online, aq sa i gjori njeri nuk di të dallojë të rëndësishmen nga e parëndësishmja. Ja, siç ndodhi edhe sot, kur një ministre ndali makinën për çuar dikë në spital, e të gjithë u turrën ta mbajnë shënim.
