Presidenti i Republikës, Bujar Nishani, priti të hënën në një takim ministrin italian të Drejtësisë, Andrea Orlando, i cili po viziton vendin tonë në kuadër të aktivitetit ndërkombëtar “Paqja është gjithmonë e mundur”, që po zhvillohet këto ditë në Tiranë.
Kreu i Shtetit në fillim të takimit i përcolli zotit Orlando falënderimet dhe mirënjohjen në emër të popullit dhe shtetit shqiptar ndaj popullit dhe shtetit italian, për ndihmesën dhe partneritetin e treguar përgjatë gjithë këtyre viteve të zhvillimit të Shqipërisë.
Sipas njoftimit për shtyp të publikuar ne faqen zyrtare të Presidencës, një pjesë e rëndësishme e bisedës u përqendrua rreth situatës në të cilën ndodhet sot sistemi ynë i drejtësisë dhe më specifikisht, rreth nevojës për kryerjen e reformave në këtë sistem. Në këtë kontekst, Kreu i Shtetit shpalosi përpara bashkëbiseduesit të tij rëndësinë që kjo reformë ka për vetë sistemin dhe çuarjen përpara të zhvillimit në tërësi të shoqërisë dhe shtetit shqiptar.
Në vijim, Presidenti Nishani nënvizoi rëndësinë që procesi i hartimit të reformës në drejtësi të jetë gjithëpërfshirës, me pjesëmarrjen e forcave politike si dhe duke thithur dhe përfshirë mendimet e ekspertëve të fushës, të pavarur nga politika dhe të painfluencuar nga konfliktet e interesit.
“Në këtë kontekst, prezenca dhe përfshirja e organizatave partnere ndërkombëtare prezente në Shqipëri është një element që rrit sigurinë dhe besueshmërinë në hartimin dhe zbatimin e kësaj reforme. Vetëm kështu do të mund të kthejmë besimin e qytetarëve tek drejtësia ku qytetarët të shohin se gjyqësori është i pavarur nga politika dhe vepron mbi bazën e profesionalizmit dhe mbi standarde të njëjta”, u shpreh ndër të tjera Kreu i Shtetit, duke i kërkuar gjithashtu ministrit Orlando angazhimin e Italisë si një zë i fuqishëm përgjatë këtij procesi shumë të rëndësishëm, çka paraqitet dhe si një nga sfidat kyçe për integrimin e Shqipërisë në Bashkimin Evropian.
Përgjatë takimit të dy bashkëbiseduesit ndanë mendime rreth fuqizimit të bashkëpunimit të mëtejshëm ekonomik dhe mbështetjes së bizneseve italiane që operojnë apo që kanë shfaqur interes për të investuar në Shqipëri në fushat e energjetikës, infrastrukturës, turizmit dhe bujqësisë. /ATSH/
