Vera e ardhshme, do ta gjejë Spitalin Universitar “Shefqet Ndroqi” të rikosntruktuar dhe me dy godina të reja, përkatësisht për imazherinë dhe administratën e mësimdhënien, si dhe sistemimet e jashtme, kanalizimet, ndriçimin dhe sistemet e lëvizjes me ashensor.
Lajmi u bë i ditur gjatë vizitës që Ministri i Shëndetësisë, Ilir Beqaj, zhvilloi sot me rastin e fillimit të punimeve për fazën e tretë dhe përmbyllëse të fuqizimit të këtij institucioni.
“Jemi këtu sot për vlerësimin e përfundimit të Fazës së dytë të Rikonstruksionit dhe Zgjerimit të Spitalit Universitar “Shefqet Ndroqi” dhe projektin e shndërrimit të tij, nga një spital mushkërish në një spital edhe më të përgjithshëm; si dhe përgatitjen e fillimit të punimeve për fazën e tretë dhe të fundit, që do të përmbyllë investimet e filluara edhe më parë në këtë spital, për të plotësuar gjithë shërbimin funksional të radiologjisë në të gjithë aspektet, edhe për pjesën e administrimit më të mirë të fluksit të pacientëve të shtruar apo atyre që vijnë nga jashtë spitalit; si edhe plotësimi i infrastrukturës së mësimdhënies për t’i dhënë një dimension të plotë spitalit edhe në aspektin universitar”- tha Beqaj.
Ministri Beqaj tha se Faza e tretë pritet të përfundojnë brenda 6 muajve sipas kushteve të kontratës, që do të thotë brenda shtatorit 2016, do të jenë në shërbim të studentëve të Fakultetit të Mjekësisë, të specializantëve, por edhe për aktivitete mjekësore, shkencore, që do të duhet të kryejnë mjekët.
