Është zhvilluar seanca e parë e gjyqit ndaj Almir Dacit, imam i xhamisë së Leshnicës në Pogradec. Gjyqi është zhvilluar në mungesë, pasi autoritetet nuk kanë informacione për vendndodhjen e tij.
Almir Daci, i njohur si një ndër militantët e shtetit islamik ISIS, është marrë i pandehur nga Prokuroria për Krime të Rënda, pasi ndaj tij rëndojnë akuzat “nxitje dhe thirrje publike për kryerjen e akteve terroriste” dhe “rekrutim i personave me qëllim kryerjen e akteve terroriste”.
Almir Daci mendohet se ndodhet në Siri, ku lufton përkrah militantëve të ISIS-it. Sipas prokurorisë, për një kohë të gjatë ai ka rekrutuar dhe dërguar drejt Sirisë besimtarë myslimanë shqiptarë, të cilët janë bërë pjesë e luftimeve përkrah organizatave terroriste në vendin e shkatërruar nga lufta.
Hetimet ndaj Almir Dacit nisën afro dy vite më parë, kur Prokuroria e Krimeve të Rënda çoi në pranga dy imamët e vetëshpallur, Genci Abdurrahim Balla, i xhamisë së Unazës së Re, dhe Bujar Hysa, i xhamisë së Mzezit, të cilët po gjykohen nga Gjykata e Krimeve të Rënda bashkë me një grup të pandehurish të tjerë.
Ky grup dyshohet se ka rekrutuar dhe dërguar drejt Sirisë një numër të konsiderueshëm besimtarësh myslimanë shqiptarë të cilët u janë bashkuar luftimeve në Siri. Por, ndërsa për pjesën e parë hetimet u përfunduan, dosja për Almir Dacin, i njohur me emrin Ebu Belkisa, u veçua. Pak muaj më parë, imami i xhamisë së Leshnicës në Pogradec u shfaq në një video, ku kërcënonte në emër të ISIS-it.
BalkanWeb
