Ngërçi për ndarjen e “Shelfit kontinetal” të Shqipërisë me Greqinë, nuk haset vetën në foltoret e Parlamentit, por dhe ujërat detare në kufi. Një situatë e tillë denoncohet nga kapiteni i një anije peshkimi shqiptare. Pronari i anijes Leonidha Qurku, ka telefonuar në “News24” duke kërkuar ndërhyrje, pasi sipas tij policia greke e Korfuzit po ushtronte presion edhe pse siç pretendon ky i fundit, anija “Mario 1”, ndodhej në ujërat shqiptare, 500 metra larg bregut, gjysmë milje brenda ujërave tona përballë Butrintit.
Kjo është e disata herë thotë pronari i anijes në Sarandë, që polica greke shtrin kompetencat e saj në ujërat detare shqiptare. Për këtë situatë pronari i anijes ka njoftuar dhe policinë tonë kufitare. Por në rastin e parë të një incidenti të ngjashëm në janar, Policia e Vlorës njoftoi se ju tërhoq vëmendje kapitenit të anijes “Mario 1” pasi ishte afruar shumë pranë në vijën fundore të kufirit detar me Greqinë.
“Shelfi kontinental” është brezi i territorit të Shtetit Shqiptar i zgjatur nën ujërat e deteve Adriatik dhe Jon, dhe përcaktimi i tij dhe kriteret mbi të cilat një shtet me bregdet mund të vendosë kufijtë e jashtëm të tij, përcaktohen në Nenin 76 të Konventës së Komisionit mbi Kufijtë e Shelfit Kontinental, të Kombeve të Bashkuara, si dhe në “Deklarata e Mirëkuptimit” të 29 Gushtit 1980.
Aktualisht me Greqinë është bërë publike “Marrëveshja mbi Detin” e vitit 2009, por që në të vërtetë është marrëveshje mbi Shelfin Kontinental (dhe pasuritë, hidrokarbure dhe botës bimore-shtazore të fundit të detit). Greqia pretendon një sipërfaqe prej 350.4 km2 nga sipërfaqja e ujërave shqiptare në Detin Jon, që do të thotë, në brendësi të Shelfit Kontinental Shqiptar natyral. Ndërkaq Greqia ka kryer punime gjeologjike-gjeofizike (sizmike-gravimetrike) në Detin Jon, kjo hapi dhe debatin e madh mbi marrëveshjen e fshehur dypalëshe.
