Një vilë me vlerë rreth 500 mijë euro e cila i përket një shqiptari, është sekuestruar nga Guardia di Finanza e Faenzas pasi pronari i saj është nën hetim për trafik droge, raportojnë mediat italiane.
Sipas hetimeve, shqiptari dyshohet se ka grumbulluar me kalimin e kohës burime të konsiderueshme financiare, të papërputhshme me të ardhurat e deklaruara, të cilat i kanë mundësuar blerjen e pasurisë së paluajtshme tashmë të sekuestruar.
Masa vjen si rezultat i hetimeve të ndërlikuara ekonomiko-pasurore, të koordinuara nga Prokuroria e Republikës pranë Ravennës dhe të zbatuara nga efektivët e Guardia di Finanza. Në veçanti, rindërtimi i kryer nga “Fiamme Gialle”, edhe përmes analizës së llogarive bankare të familjes së të hetuarit, ka nxjerrë në pah një menaxhim anormal të burimeve financiare.
Gjatë hetimit disavjeçar, është konstatuar se shpenzimet për mbijetesën e përditshme të një familjeje, si për shembull blerja e produkteve ushqimore apo e veshjeve, ishin minimale. Po ashtu, është vërejtur mungesë pothuajse totale e tërheqjeve të parave ‘cash’ dhe e debitimeve për karburant.
Para ‘cash’ dhe trafik droge
Falë kryqëzimit të informacioneve të mbledhura gjatë hetimeve, në lidhje me aktivitetet e paligjshme të kryera nga subjekti, është bërë e mundur të konstatohet se fondet e akumuluara në llogaritë bankare, në bazë të të ardhurave nga puna e varur që ai deklaronte, ishin të mundura falë disponueshmërisë së konsiderueshme të parave në dorë, të lidhura me trafikun e paligjshëm për të cilin ai ishte nën hetim.
Mospërputhje mes të ardhurave dhe pasurisë
Nga rindërtimi i detajuar i profilit ekonomiko-financiar të të gjithë familjes, është konstatuar se ishte i papajtueshëm me investimet pasurore dhe, në veçanti, me blerjen e fundit të një prone me vlerë të lartë. Ekzekutimi i sekuestrimit, i urdhëruar nga Autoriteti Gjyqësor vendor, përbën një masë që lejon konfiskimin e pasurive të konsideruara me origjinë të paligjshme, kur ato rezultojnë në mospërputhje me kapacitetin e të ardhurave të deklaruara.
