Dronët, të përdorur gjerësisht vitet e fundit në konfliktet ushtarake dhe për operacione të ndryshme të sigurisë, mund të marrin një rol të ri në bujqësinë evropiane. Komisioni Evropian po shqyrton ndryshimin e rregullave që kufizojnë përdorimin e mjeteve ajrore pa pilot për spërkatjen e pesticideve.
Nisma është pjesë e një rishikimi më të gjerë të rregullave të Bashkimit Evropian për produktet e mbrojtjes së bimëve. Disa vende anëtare kanë kërkuar prej kohësh më shumë fleksibilitet për përdorimin e kësaj teknologjie në bujqësi.
Dronët përdoren tashmë në shumë vende për monitorimin e të korrave, identifikimin e dëmtuesve dhe sëmundjeve, si dhe për aplikimin me saktësi të plehrave dhe produkteve për mbrojtjen e bimëve.
Mbështetësit e teknologjisë argumentojnë se përdorimi i dronëve mund të reduktojë sasinë e pesticideve, pasi substancat mund të aplikohen vetëm në zonat ku është e nevojshme ndërhyrja. Kjo mund të ulë kostot për fermerët dhe ndikimin në mjedis.
Komisioneri Evropian për Bujqësinë, Christoph Hansen, ka deklaruar se Evropa ka potencialin dhe teknologjinë për të avancuar në bujqësinë dixhitale dhe se fermerët duhet të kenë mundësi të përfitojnë prej tyre.
Rregullat aktuale të BE-së kufizojnë spërkatjen ajrore me pesticide për shkak të shqetësimeve lidhur me përhapjen e pakontrolluar të kimikateve, ndotjen e mjedisit dhe ekspozimin e njerëzve.
Megjithatë, këto rregulla janë hartuar përpara zhvillimit të teknologjisë moderne të dronëve bujqësorë.
Në raste të veçanta, autoritetet kombëtare mund të lejojnë aplikimin ajror të pesticideve, veçanërisht në zona ku përdorimi i traktorëve është i vështirë ose i rrezikshëm, si vreshtat në terrene të pjerrëta dhe zona të përmbytura.
Pavarësisht potencialit të dronëve, Komisioni Evropian pranon se ende ka pikëpyetje mbi sigurinë dhe ndikimin e tyre.
Një nga çështjet kryesore është përcaktimi i distancës në të cilën era mund të transportojë pesticidet dhe mënyra se si substancat mund të aplikohen në mënyrë sa më të kontrolluar.
Për këtë arsye, çdo ndryshim i rregullave pritet të shoqërohet me kritere dhe vlerësime të sigurisë.
BE synon që dronët të jenë pjesë e një strategjie më të gjerë për zhvillimin e bujqësisë dixhitale, së bashku me inteligjencën artificiale, satelitët dhe teknologjitë e bujqësisë precize.
Megjithatë, nisma ka edhe kundërshtarë. Organizatat mjedisore kërkojnë më shumë prova shkencore përpara zgjerimit të përdorimit të dronëve për spërkatjen e pesticideve. Në fokus janë edhe shqetësimet për privatësinë dhe mundësinë që kostoja e lartë e teknologjisë të krijojë diferenca më të mëdha mes fermave të mëdha dhe prodhuesve të vegjël.
Sipas propozimit në shqyrtim, shtetet anëtare do të mund të autorizojnë më gjerësisht përdorimin e dronëve, nëse vlerësohet se ata nuk paraqesin rrezik më të madh se metodat tradicionale të aplikimit në tokë.
