Në konfliktin e Sirisë nga Kosova janë përfshirë 44 gra, prej të cilave 7 janë kthyer. Ndërkohë që 37 fëmijë gjenden ende në zona të luftës në Lindjen e Mesme.
Këto të dhëna janë prezantuar të enjten në Prishtinë, në një tryezë ku është diskutuar rreth zbatimit të Strategjisë Nacionale dhe Planit të veprimit në parandalimi të ekstremizmit të dhunshëm dhe radikalizmit që shpije në terrorizëm 2015 – 2020.
Tema e diskutimit, kësaj radhe ishte, “Fuqizimi i rolit të gruas në parandalim të ekstremizmit të dhunshëm; të arriturat dhe sfidat në Komunën e Prishtinës”, organizuar nga Qendra Kosovare për Studime të Sigurisë.
Aty u tha se qëllimi i këtij diskutimi është që të fuqizohet roli dhe angazhimi i grave në parandalim e ekstremizmit të dhunshëm, me theks të veçantë, këtë herë, në Komunën e Prishtinës. Andaj, edhe panelistet në diskutim ishin vetëm gra që përfaqësonin Policinë, Komunën e Prishtinës dhe Bashkësinë Islame të Kosovës.
Taibe Canolli nga Policia e Kosovës, tha se nga 44 gra të përfshira në konfliktin e Sirisë, vetëm 7 shtatë prej tyre janë kthyer në Kosovë.
Strukturat e sigurisë në vend kanë theksuar se në fushëbetejat e huaja janë duke qëndruar ende 140 persona, në mesin e të cilëve ka edhe gra dhe fëmijë. Nga këto vende të luftës, në Kosovë tashmë janë kthyer 100 persona, përgatiti Koha. (b.an)
