Nga Janari 2017 do të hyjnë në fuqi lejet e reja të drejtimit për auto dhe moto mjetet. Lejet e reja vijnë si pjesë e direktivave të Bashkimit Europian për ta njehsuar sa më shumë patentën Shqiptare me ato të Bashkimit Europian.
Ndryshimet që do të kenë lejet e reja të drejtimit i ka sqaruar për Agjencinë Telegrafike Shqiptare, Nikolin Bërxhiku, Specialist në Drejtorin e Qarkullimit Rrugor në Ministrinë e Transportit.
Duke për folur për kategorizimet e reja, Bërxhiku bëri të ditur që drejtuesit e mjeteve që kanë patentë të klasit B (pra për vetura) mund të drejtojnë dhe moto mjete deri në 125 kubik, një risi që nuk lejohej më parë. “Për moto mjetet më shumë se 125 kubik duhet që personi ti nënshtrohet testeve praktike sipas rregullores”, tha Bërxhiku, duke bërë të ditur kështu se edhe motomjetet do të kenë një nën ndarje më vete, ashtu siç kanë dhe kategoritë e tjera. “E veçantë për klasin B do të jetë për drejtuesit e mjeteve me karavan (rulo) të cilët do ti duhet ti nënshtrohen testeve praktike, pasi do të jetë një nënndarje më vete”, tha Bërxhiku.
Po ashtu ai bëri të ditur se në testet teorikë dhe praktikë do të kalojnë vetëm ata që kanë 10% të gabimeve. “Kjo nuk ka ndryshuar. Pra gjithnjë hapësira për të gabuar është 10%. Ajo që ka ndryshuar sipas udhëzimit të ri është numri i pyetjeve në teste që është bërë 40, pra tashmë i bie me katër pyetje gabim të mos e marrësh testin”, tha Gërxhiku.
Specialisti i Drejtorisë së Qarkullimit Rrugor në Ministrinë e Transporteve gjithashtu bëri të ditur se çmimet për pajisje me patentë nuk kanë ndryshuar. “Kosto e marrjes së një leje drejtimi përbëhet nga tre komponent, taksa e shërbimit, taksa e kartonit dhe çmimi për tu bërë kursant. Dy të parat nuk kanë ndryshuar, pasi janë në tagrin tonë, ndërsa sa i takon pjesë së kursantëve, pra auto-shkollës ku bëhet praktika dhe teoria janë sipërmarrje private dhe çmimi në këtë rast diktohet nga tregu”, tha Bërxhiku.
Sa i takon ndarjes kamio automatike dhe manuale ai shpjegon se ndryshimet janëbërë sipas modelit të BE-së. “Duke iu bashkangjitur modelit të Bashkimit Europian, ndarjet për mjete me kuti shpejtësie automatike dhe manuale do të përcaktohen në lejet e reja të drejtimit. Por duhet të jemi të qartë, që personat që janë pajisur me leje drejtimi për mjete me kuti shpejtësie manuale përfshinë dhe mundësinë për të drejtuar një mjetë me kamio automatike. E kundërta nuk pranohet, por duhet të bërë një kurs praktik shtesë për tu pajisur me këtë drejtë”, nënvizoi Bërxhiku.
Gjatë intervistës për ATSH-në, Bërxhiku sqaroi dhe “ngërçin” e krijuar mes shitësve dhe blerëve të mjeteve. “Ka raste kur një person ka shitur mjetin e tij dhe blerësi nuk ka bërë regjistrimin brenda 10-ditëve siç është përcaktuar nga kodi rrugor. Shitësi në këtë rast vijon të jetë mbartës i gjobave dhe taksave të mjeteve, çka ka sjellë dhe një problematikë në drejtorinë e transportit rrugor, pasi në rast se shitësi kërkon të marrë leje qarkullimi ndërkombëtare, duhet të ketë me vete dhe aktin noterial të makinës së shitur, por jo të regjistruar në DPTR. Kjo është një çështje që është marrë dhe organi kompetent në luftën kundër informalitetit, pasi mos regjistrimi i mallit të blerë përbën in formalitet”, tha Bërxhiku.
Sa i takon lejet e reja të qarkullimit, duke parë problematikën e shtuar të adresave, Bërxhiku bëri të ditur se çështja është ende në diskutim.
