Duket se nëntori i vitit të kaluar, dhe tensioni që pati takimi mes Ramës dhe Vuçiç është një kohë e largët. Kjo pasi dy kryeministriat kanë përmirësuar ndjeshëm raportin jo vetëm mes dy vendeve, por edhe mes tyre aq sa shkëmbejnë edhe batuta.
E tillë ishte situata sot në Forumin Ekonomik të Vjenës që u mbajt në Tiranë. Pas fjalës së mbajtur nga kryeministri Edi Rama, radha ishte për kreun e qeverisë serbe, Aleksandar Vuçiç.
Ky i fundit e ka nisur me batutë ndaj kryeministrit Rama, duke komentuar për kohën që foli kryeministri shqiptar dhe kalimit të 10 minutave që i ishin caktuar nga moderatori i panelit.
“E dija që Edi Rama do ta kalonte kohën, e bën gjithmonë këtë”, tha Vuçiç, ndërsa nuk harroi të ndalonte sërisht tek elementi “kohë” edhe në fund të fjalës së tij.
“Besoj se nuk fola shumë, 8 minuta kam folur”, tha kryeministri serb, Aleksandar Vuçiç.
