Kryeministri izraelit Benjamin Netanyahu tha të martën se nuk ishte e mundur të arrihej asnjë marrëveshje diplomatike me zyrtarët iranianë, të cilët ai i përshkroi si “të egër”, ndërsa përshëndeti fushatën e re të presionit ekonomik ndaj Teheranit të njoftuar nga Presidenti i SHBA-së Donald Trump.
Duke iu referuar takimit të tij të fundit me republikanin, Netanyahu theksoi të martën në mbrëmje, gjatë një aktiviteti se ata diskutuan negociatat me Iranin.
Kryeministri izraelit thuhet se i tha Trumpit:
“Dyshoj se mund të arrijmë një marrëveshje me atë bandë atje, me ata të egër. Po ju them, nuk mund të arrihet asnjë marrëveshje.”
Një kritik i ashpër i marrëveshjes së vitit 2015 mbi programin bërthamor iranian, nga e cila SHBA-të u tërhoqën tre vjet më vonë gjatë mandatit të parë të Trump, Netanyahu ka shprehur prej kohësh dyshime rreth mundësisë së arritjes së një marrëveshjeje me Iranin përmes kanaleve diplomatike.
Megjithatë, ai ka qenë i kujdesshëm që të mos e kritikojë shumë hapur presidentin amerikan kur ai kërkoi një rrugëdalje të negociuar nga lufta në Lindjen e Mesme, e cila shpërtheu më 28 shkurt pas sulmeve amerikane-izraelite kundër Iranit.
Dhe ai nuk kishte zgjidhje tjetër veçse të pranonte armëpushimin e arritur midis SHBA-së dhe Iranit në prill.
SHBA-të njoftuan të hënën vendosjen e sanksioneve të reja dhe të rrepta kundër Iranit, me qëllim që ta ulin ekonominë e vendit, e cila tashmë i është nënshtruar një sërë sanksionesh për vite me radhë.
Dje, Netanyahu mbështeti publikisht fushatën e presionit ekonomik. Trump zgjodhi të shënjestrojë Iranin, por edhe “të shtrëngojë bllokadën ndaj atyre që mbështesin këtë regjim, këtë diktaturë të tmerrshme”, tha ai.
