EKSKLUZIVE/ Të enjten Gjykata Kushtetuese do të japë verdiktin e saj në lidhje me ligjin e shumëpërfolur të Vetting-ut. Thënë ndryshe, do të marrë një qëndrim ndaj asaj që shihet si pika e gravitacionit e të gjithë paketës së reformës kushtetuese. Pasi ligji në fjalë ka marrë gjykimin pozitiv të Komisionit të Venecias, i cili është shprehur se nuk gjen shkelje kushtetuese, Vetting-u shqiptar do t’i nënshtrohet panelit të Kushtetueses, në një votim që pritet me interes nga opinioni publik i brendshëm dhe ai i jashtëm.
Pozicionet e palëve politike ndaj ligjit janë tërësisht të polarizuara. Nga njëra anë maxhoranca, e cila shprehet mosprekjes së ligjit nga ana e Kushtetuese dhe nga ana tjetër opozita, që ka bërë një sërë vërejtjesh në lidhje me atë që ajo e konsideron si vënie e procesit të verifikimit të gjyqtarëve e prokurorëve nën vullnetin e kryeministrit Rama.
E gjetur në këtë pozicion delikat, Gjykata Kushtetuese ftoi, gjatë shqyrtimit të parë të Vetting-ut, Komisionin e Venecias, për një opinion miqësor në lidhje me ligjin. Tani që ky opinion erdhi, ajo që mbetet është që Kushtetuesja të veprojë në konform me piketat e vendosura nga ekspertët e Venecias. Paralelisht me OK e dhënë në Venecia, Vetting-u ka pasur prej kohësh mbështetjen totale të BE e SHBA, të cilat më shumë se një herë janë shprehur që ligji duhet të hyjë në fuqi sa më shpejt dhe pa u deformuar në thelbin e tij.
Burime të mirëinformuara pranë Gjykatës Kushtetuese i thanë Javanews të martën se brenda panelit të gjyqtarëve ka një qëndrim ende të dyzuar, sa i përket fatit të mëtejshëm të ligjit. Mendohet se të paktën dy gjyëtarë, përkatësisht Vladimir Kristo dhe Gani Dizdari, mund të rreshtohen pro shfuqizimit të ligjit, çka do ta kthente praktikisht në zero orën e reformës në drejtësi. Dy gjyqtarë të tjerë mendohet se janë për miratimin e ligjit duke i bërë ndryshime disa prej neneve, pa përcaktuar saktë se cilat. Kurse në katër gjyqtarë që mbeten, tre prej tyre (përflitet se këtu bën pjesë edhe kreu i Kushtetuese), janë për mosprekjen e ligjit dhe një i katërt që është i mëdyshur.
Nëse kjo ndarje votash do të rezultonte e saktë, situata për Vetting-un do të paraqitej komplekse dhe e paqartë. Më konkretisht, nëse gjyqtari i lëkundur do t’i bashkohej tre të tjerëve që janë për kalimin siç është të ligjit, Gjykata do të ndahej dhe kësisoj nuk do të kishim një vendim të Kushtetuese. Nëse ky anëtar do të kalonte në krahun tjetër, ose nëse do të krijoheshin kombinacione që do të shtynin për rrëzimin ose korrigjimin e ligjit, Kuvendi do të ftohej që të kryente ndërhyrje në tekst. Dhe këtu opsionet janë të shumta dhe varen nga thellësia e ndërhyrjes që do të kërkonte vendimi i Kushtetuese. Duhet thënë se edhe varianti i ndryshimit eventual të ligjit do të sillte vonesa fatale në fillimin e zbatimit të reformës, duke shtyrë gjithçka për vitin 2018.
Megjithatë ka edhe diçka më shumë se 24 orë deri në mbledhjen e Gjykatës Kushtetuese. Presioni ndërkombëtar dhe ai i pjesës më të madhe të klasës politike dhe opinionit publik shqiptar, shtyjnë fort për një kalim të shpejtë të Vetting-ut, pa prekur thelbin e tij. Të shohim nëse gjyqtarët e Kushtetuese do t’i thonë “JO” të gjithë këtyre faktorëve. Por edhe një faktori të fundit, të cilin ata e vunë vetë në lëvizje: Komisionit të Venecias. Të enjten mësojmë nëse Shqipëria vijon rrugën drejt fillimit të zbatimit të reformës në drejtësi, apo do të hyjë në një qerthull të rrezikshëm, ku nuk dihet se çfarë mund të ndodhë./java/a.k
