Lufta në Ukrainë ka sjellë shqetësime për sigurinë në Evropë. Teksa është kthyer pas në kohë, këngëtarja Mihrje Braha, ka kujtuar agresionin serb ndaj Kosovës.
Ajo rrëfeu se para se të nisnin bombardimet serbët që banonin në të njëjtin pallat me të, kanë qëlluar me automatik në dritare. Këngëtarja rrëfeu se në atë moment ka marrë të birin në gji për ta mbrojtur nga plumbat.
Mihrije Braha tha se nëse Kosova do sulmohej sërish nga Serbia, këtë herë nuk do të emigronte por do të qëndronte në shtëpinë e saj, edhe nëse do ta vrisnin, duke theksuar se ajo që po ndodh në Ukrainë është e tmerrshme.
“Para se të fillonin bombardimet jetonim në një pallat 9 katësh, ishin 47 familje aty. Ka pasur edhe serbë, në orën 1-2 të natës serbët hapën dritaret dhe qëllonin me automatik me shqetësuar gjithë lagjen, edhe neve që jetonim aty. Mbaj mend që kam marrë Platorin, e kam futur në gji. Plumbi më mirë të më kapte mua se atë.
Kjo është e tmerrshme çfarë po ndodh. Kjo ndihet edhe tek ne në Kosovë, ka pasur naik, njerëzit kanë filluar të blejnë rezerva ushqimore. Ndihemi të frikësuar se mos Serbia na sulmon, ishalla nuk ndodh, por nëse ndodh ju betohem që nuk do të lëviz nga ky vend ku jam këtu, s’do e bëj më si herën e kaluar. S’do dal refugjate rrugëve, kur të më çojë fati i jetës duke ikur prej kriminelëve. Do qëndroj këtu në shtëpinë time, ku kam lindur dhe rritur. Edhe nëse do më vrisnin, s’dua ta përjetoj më atë dramë dhe s’dua të shoh ashtu skenash më”, rrëfeu ajo./m.j
