Nënshtetësia për emigrantët në shtetin helen ka rënë përsëri viktimë e krizës ekonomike. Zhvillimet ditëve të fundit e kanë zhvendosur sërish procesin e miratimit të ligjit për nënshtetësinë e brezit të dytë, që përmban edhe rregullime të tjera për emigrantët me probleme. Për sot, e mërkurë ishte në rend të ditës seanca e fundit e diskutimit nen për nen dhe hedhja në votë.
Mirëpo, Parlamenti grek i ka pezulluar të martën punimet që do të rifillojnë pas mbajtjes së referendumit, në kohën që nuk përjashtohet të ketë edhe zhvillime të tjera të rrufeshme.
Dimitris Christopoulos, pedagog dhe aktivist i të drejtave të njeriut, njëkohësisht këshilltar i ministres së Politikave të emigracionit, ka reaguar për këtë “pezullim” të ri, nëpërmjet një statusi të publikuar në murin e tij në facebook.
“Sot do të përfundonte dhe diskutimi nen për nen i projektligjit për nënshtetësinë dhe votimi i tij. Mirëpo parlamenti u mbyll. Kështu që, shkojmë për më vonë. Nuk e di se kur më vonë. Kur javën e kaluara paralajmërova të mos gëzohemi se “java e ardhshme nuk është dhe më e parashikueshmja në pikëpamje politike”, disa miq më thanë se po ekzagjeroj. Për fat të keq, nuk ekzagjeroja dhe natyrisht nënshtetësia është një “dëmtim anësor” për shkak të konjukturës. Nuk mund të mos mendoj se u humb (edhe) ky shans”.
