Në muajin dhjetor 2015, kur pritej që të jepej edhe drita jeshile për liberalizimin e vizave, Komisioneri për Migrim, Çështje të Brendshme dhe Shtetësi i Bashkimit Evropian, Dimitris Avramopoulos, deklaroi se shteti i Kosovës duhet të përmbushte edhe disa kritere për heqjen përfundimtare të vizave.
Njëri nga kriteret i cili u kërkua të përmbushet në këtë rrugëtim të Kosovës, kishte të bënte me fushën e riatdhesimit, përkatësisht krijimi i fondit për riatdhesim. Kjo ishte edhe temë diskutimi në një tavolinë ku ministri i Punëve të Brendshme, Skënder Hyseni, mblodhi kryetarët e komunave në Kosovë, në prezencën edhe të shefit të Zyrës së BE-së në Kosovë, Samuel Zhbogar, kryeministrit Isa Mustafa, dhe ministrit për Integrime Evropiane, Bekim Çollaku.
I vetmi i cili foli në praninë e mediave ishte ministri i Punëve të Brendshme, Skender Hyseni, i cili tha se deri tani janë riatdhesuar rreth 17 mijë azilkërkues. Ai garantoi se do t’i qëndrojnë besnik riatdhesimit efektiv dhe riintegrimit të gjithë atyre të cilëve iu refuzohet kërkesa për azil.
“Pavarësisht nga statistikat buxhetore që mund të evidentohen pas analizave që kemi bërë, dihet që numri i përfituesve nga fondi për riatdhesim është konsiderueshëm më i lartë se në vitin paraprak, dhe kjo shifër na ofron një garanci që edhe më tej do ta menaxhojmë mirë këtë proces”, tha ministri Hyseni.
Hyseni ftoi kryetarët e komunave që të vazhdojnë fushatën për sensibilizimin dhe informimin e të riatdhesuarve për mundësinë e përfitimit nga fondi për riintegrim.
Ai madje tha se në procesin e riintegrimit të azilkërkuesve rol të rëndësishëm dhe të pazëvendësueshëm kanë edhe komunat. Komunat që ende kanë plane për riatdhesim janë komuna e Prishtinës, e Fushë Kosovës, Graçanicës, Parteshit, Zveçanit, Zubin Potoku, Leposaviqi dhe Mitrovica e Veriut.
