Shqipëria për Ukrainën tashmë është në listën e partnerëve të ngushtë.
Me anë të një njoftimi zyrtar, Ministria e Jashtme e Ukrainës e ka falënderuar Shqipërinë dhe 30 shtete të tjera, për ndihmën e ofruar gjatë kësaj periudhe kritike.
Valerii Zaluzhnyi, Komandant i Përgjithshëm i Forcave të Armatosura të Ukrainës, ka shprehur mirënjohjen për “ndihmë dhe mbështetje të palëkundur në këto kohë të vështira”.
Shqipëria, Australia, Azerbajxhani, Belgjika, Bullgaria, Kroacia, Republika Çeke, Britania e Madhe, Kanadaja, Danimarka, Gjermania, Greqia, Estonia, Egjipti, Franca, Finlanda, Italia, Letonia, Lituania, Luksemburgu, Holanda, Maqedonia e Veriut, Norvegjia, Polonia, Portugalia, Rumania, Sllovakia, Suedia, Spanja, Turqia dhe Shtetet e Bashkuara të Amerikës janë përfshirë në listë.
Lista përfshin ato vende që kanë ofruar mbështetje me armë për Ukrainën që nga pushtimi rus më 24 shkurt, përcjell Albanian Post.
Po ashtu, Kuvendi i Shqipërisë e ka futur zyrtarisht në rendin e ditës së seancës plenare të 3 majit, adresimin që Presidenti i Ukrainës, Volodymyr Zelensky, do të mbajë përballë deputetëve shqiptarë dhe mbarë kombit shqiptar.
Fjala e Zelenskyt do të transmetohet përmes platformës Zoom dhe pritet të mbahet rreth orës 13:00.
Pas shumë mesazhesh virtuale të dërguara për vendet më të fuqishme të botës, tashmë presidenti ukrainas po merr iniciativën për adresimin e tij dhe të thelbit të çështjes së Ukrainës edhe karshi vendeve më të vogla, ku bën pjesë edhe Shqipëria.
“Shqipëria pa dyshim që nuk është prapa vendeve të tjera, ne tashmë kemi dërguar ndihmën e parë të rëndësishme, të qenësishme në mjete ushtarake në Ukrainë dhe jemi angazhuar edhe sot e në vijim për të shtuar kontributet me gjithë mundësitë tona, qoftë me municione dhe me mjete ushtarake, por pa dyshim edhe me pajisje humanitare qoftë nga ushtria shqiptare, por edhe nga shoqëria civile”.
Kjo ishte deklarata e ministrit shqiptar të Mbrojtjes, Niko Peleshi, gjatë muajit mars.
Asokohe, zyrtari shqiptar nuk ndau detaje mbi sasitë apo llojin e municioneve dhe pajisjeve ushtarake që janë dërguar në Ukrainë.
Peleshi bënte me dije se autoritetet shqiptare kanë ndihmuar dhe mbështetur me logjistikë vende anëtare të NATO-s.
Më herët u zbulua se ndihmat ushtarake nga Shqipëria organizoheshin përmes fluturimeve në Islandë.
Ndër 13 vendet e përfshira në organizimin e këtyre fluturimeve, në bashkëpunim me Qeverinë dhe Ushtrinë e Islandës, gjendej e përfshirë edhe Tirana zyrtare.
Në tërësi, bëhet fjalë se ka pasur 13 fluturime që prej fundit të shkurtit, me armatime nga Shqipëria, Sllovenia, Italia, Kroacia dhe Portugalia, raporton Albanian Post.
