Armando Sadiku pritet të luajë i vetëm në sulm në sfidën e kuqezinjve përballë Izraelit në Haifa.
Trajneri Gianni De Biasi ka provuar edhe një herë formacionin që do të hedhë në fushë, teksa konfirmohet skema 4-1-4-1, me sulmuesin e Luganos në vijën e parë të sulmit.
Elbasanasi ka fituar duelin direkt me Sokol Çikalleshin për një vend nga minuta e parë. Pas eksperimentit të dështuar me skemën 3-5-2, De Biasi ka punuar gjatë ditëve të fundit me variantin taktik 4-1-4-1, që në fazën ofensive bëhet 4-3-3.
Katër lojtarë me tipare ofensive do të jenë në fushë që nga minuta e parë.
Në portë do të startojë nga minuta e parë Thomas Strakosha. Në vijën e mbrojtjes në mungesë të Ansi Agollit do të aktivizohet Naser Aliji i Kasierslautern në Bundesligën e dytë gjermane.
Hysaj në të djathtë dhe Gjimshtin me Mavrajn në qendër, plotësojnë repartin e prapavijës.
Përpara mbrojtjes në rolin e një kontrollori do të jetë Burim Kukeli.
Mesfusha do të përbëhet nga Odise Roshi në të djathtë, Abrashi e Memushaj në qendër dhe Jahmir Hyka në të majtë.
Sulmi do të jetë i tëri për Armando Sadikun. Kuqezinjë janë optimistë për një fitore në Izrael, pasi kanë zhgënjyer në takimet e fundit eliminatore për Kupën e Botës Rusi 2018.
Kompeticion për të cilin kuqezinjtë janë jashtë objektivave, në një grup ku ndodhen edhe Spanja kryesuese me Italinë e vendit të dytë. /b.d
