Sot futbolli shqiptar mbyll vitin 2024 me ndeshjen e fundit, finalen e Superkupës Egnatia-Kukësi. Egnatia vjen në këtë sfidë si ekipi kampion i Shqipërisë dhe fituesi i Kupës, ndërsa Kukësi si finalisti i Kupës së Shqipërisë. Rrogozhinasit e kërkojnë këtë trofe për t’u bërë ekipi i parë në histori që bën një “tripletë” trofesh në një sezon. Klubi i Superligës po bën shumë mirë dhe këtë edicion është mes pretendentëve.
Edhe pse në letër diferencat janë të mëdha mes dy ekipeve, në 90 minuta do të luhet gjithçka për gjithçka me dy ekipet që do të luftojnë për trofeun e parë të sezonit. Skuadra e Edlir Tetoves edhe pse me dëmtime që e kanë ndjekur gjatë sezonit, ka konfirmuar kanditaturën e saj mes 4 ekipeve më të mira në kampionat dhe ambiciet janë për të fituar çdo trofe. Nuk mund të thuhet e njëjta gjë për Kukësin që pas rënies në Kategorinë e Parë, ka pësuar shumë ndryshime dhe mbetet shumë larg pritshmërive, shkruan A2.
Edhe me histori, Egnatia është e avantazhuar. Në 23 përballje, rrogozhinasit numërojnë 11 fitore, ndërsa Kukësi ka triumfuar 10 herë ndërsa dy ndeshje janë ndarë në barazim.
Egnatia synon që për herë të parë në histori të ngrejë lart trofeun e Superkupës, ndërsa Kukësi shpreson të bëjë surprizën. Finalja e Superkupës së Shqipërisë, Egnatia-Kukësi do të luhet këtë të enjte në orën 19:00 në Arenën Kombëtare.
