Bashkimi Evropian mori çmimin Princesha e Asturias së Konkordës, konsideruar si Nobeli i botës hispanike, për modelin unik të integrimit mbikombëtar.
“Bashkimi Evropian ka mundësuar periudhën më të gjatë të paqes të Evropës moderne dhe ka shpërndarë në botë vlera si liria, të drejtat e njeriut dhe solidariteti”, nënvizoi presidenti i jurisë, Javier Fernandez.
“Është një nder të marr çmimin Princesha e Asturias së Konkordës. Një mirënjohje për 60 vite paqe, demokraci dhe prosperitet të BE-së”, theksoi në një mesazh në rrjetin social Tëitter, Donald Tusk, presidenti i Këshillit Evropian.
Çmimi u dha me rastin e 60-vjetorit të Traktatit të Romës, që vendosi bazat e asaj që do të bëhej Bashkimi Evropian dhe pesë vjet pas dhënies së çmimit Nobel për Paqe për BE-në.
“…ndërkohë që BE po kalon momente konfuzioni, është mirë që ne të njohim ato që ajo ka bërë për të rimarrë forcat dhe për të dhënë përgjigje për të ardhmen”, reagoi ministri spanjoll i Kulturës, Inigo Mendez de Vigo, përcjell Atsh.
Bashkimi Evropian është zhytur sot në një krizë të madhe mes shumë atentateve, krizës ekonomike, vështirësive për të pritur refugjatët dhe daljen e Britanisë së Madhe nga BE, në një kontekst të rritjes së euroskepticizmit. (b.an)
