Shpërthime masive goditën disa vende në Teheran gjatë natës duke u gdhirë e premtja, duke përfshirë zonat e banuara dhe rrethinat e Universitetit të Teheranit, ndërsa lufta hyri në ditën e saj të shtatë.
Izraeli po ashtu ka përqendruar vëmendjen në Liban, ku ka goditur pozicionet e Hezbollahut. Sipas forcave mbrojtëse të Izraelit, Beiruti u sulmua 26 herë dhe një prej shënjestrave ishte edhe Këshilli Ekzekutiv i grupit militant Hezbollah.
Ndërkohë, forcat amerikane njoftuan se kanë fundosur një transportuese dronësh iranianë, teksa gjenerali i Komandës Qendrore ka deklaruar se nuk do të ndalen deri sa të eliminojnë plotësisht marinën detare të Iranit.
Nga ana tjeter presidenti Trump deklaroi se florta iraniane është e shkatërruar.
“Ata nuk kanë më flotë detare, nuk kanë më forcë ajrore, është shkatërruar. Nuk kanë më sistem zbulimi ajror. Radarët e tyre janë goditur dhe pothuajse gjithçka është neutralizuar”, tha Trump.
Mbi 1300 persona janë vrarë deri më tani në sulmet amerikane dhe izraelite. Ndërkohë Irani vazhdoi të shënjestrojë vendet e Gjirit, nga Emiratet e Bashkuara Arabe deri në Katar dhe Bahrein.
