Festat e fundvitit kanë rritur fluksin e punës në pikat kufitare pasi shqiptarët kthehen në atdhe ose udhëtojnë drejt vendeve fqinje për të festuar natën e 31 dhjetorit.
Për këtë, Policia Kufitare ka shtuar masat që të eliminojë radhët e gjata në Kapshticë e Kakavijë.
“Kemi shtuar sportelet dhe po punojmë me kapacitet të plotë. Deri në këto momente nuk ka patur radhë të gjata në pikën e kufirit. Kjo ka ardhur dhe prej bashkëpunimit me policinë greke. Fluksi është më i madh se vitin e kaluar”, tha Shefi i Stacionit të Policisë Kufitare Kakavijë Vilson Dine.
Mbi 250 mijë shtetas dhe 70 mijë automjete kanë hyrë në Shqipëri përgjatë javës nëpërmjet pikave të kalimit kufitar.
Falë bashkëpunimit, Policia Kufitare greke ka aplikuar masa të njëjta për të siguruar një lëvizje të njëtrajtshme dhe eliminuar radhët.
Ndërkohë janë shtuar kontrollet në vijën e dytë në dalje me qëllim parandalimin dhe goditjen e tentativave të mundshme për trafikim të lëndëve narkotike duke përfituar edhe nga fluksi.
Në kufirin jeshil janë shtuar patrullimet në bashkëpunim me FRONTEX-in dhe me Policitë Kufitare homologe, me qëllim kontrollin sa më të mirë të kufirit, për të parandaluar dhe goditur paligjshmërinë.
/a.r
