Vizita e dhëndrit dhe vajzës së Presidentit amerikan Donald Trump në Vlorë, për të inspektuar nga afër projektet ambicioze në Sazan dhe Zvërnec, është lexuar jo vetëm si zhvillim ekonomik, por si një fitore e rëndësishme politike e Kryeministrit Edi Rama.
Në emisionin “Trialog” në RTSH, analisti Preç Zogaj u shpreh se kjo javë ka shënuar një kthesë në marrëdhëniet Tiranë-Uashington, të cilat sipas tij, kishin kaluar në një “ngrirje” pas ndërrimit të administratës në Shtëpinë e Bardhë.
Dy lajmet e mira për Ramën
Sipas Zogajt, pas një periudhe të gjatë me “raporte zero me administratën Trump”, kreu i qeverisë shqiptare ka marrë dy sinjale pozitive brenda pak ditësh.
“Lajmi i parë është ftesa për në Bordin e Paqes, një ftesë që i bëhet Shqipërisë, por që ekspozon Kryeministrin. Dhe menjëherë pas saj, vizita e vajzës së Trump (Ivanka) dhe bashkëshortit të saj, që i rikthehen një projekti të nisur para se Trump të rimerrte pushtetin,” analizoi Zogaj.
Analisti solli në vëmendje edhe manovrat politike të Ramës, duke kujtuar se si ai kishte përgatitur terrenin për këtë afrimitet, madje duke sfiduar hapur administratën e kaluar demokrate gjatë vizitës së Sekretarit Blinken në Tiranë.
“Rama sfidoi edhe Blinken në Tiranë, kur tha se Trump e bën më mirë këtë punë. Ai ishte investuar që të shihej me simpati nga administrata e re,” tha Zogaj.
Zogaj ngriti edhe një shqetësim etik lidhur me përfshirjen e familjarëve të krerëve të shteteve të fuqishme në biznese ndërkombëtare gjatë kohës që janë në pushtet.
“Do të kisha preferuar që investimet e individëve që janë pjesë e paneleve të krerëve të shtetit, sidomos në rastin e SHBA që është nbjë shtet i fuqishëm, të bëheshin kur ata nuk janë në pushtet,” përfundoi ai.
