50 histori të ish të burgosurve në burgun e Spaçit do të rrëfehen ditën e diel, më 21 Maj pikërisht në vendin që mbart aq shumë vuajtje. Një prej tyre u nda në programin “Shije Shtëpie” në Tv Klan nga ish i dënuari Agron Hoxhaj. Në moshën 19-vjeçare, ndërsa së bashku me shokun e tij tentoi të arratisej për shkak të regjimit komunist, të dy u arrestuan dhe dënuan. Agroni kaloi 15 vjet në Spaç.
Agroni tregon se si po përgatiteshin për t’u larguar, vetëm me dëshirën e madhe për të qenë të lirë, të gatshëm për të bërë gjithçka. Të rinjtë kishin kërkuar ndihmën e një personi të tretë, i cili i kallëzoi dhe i ruante për më shumë se 2 javë.
Agron Hoxhaj: Ne në ato momente po përgatiteshim për të ikur. Ishte data 7 Janar dhe unë bashkë me shokun tim kishim 2 variacione për t’u arratisur. Nga Saranda, nga bregdeti, Ishte kepi i Stillos që ishim përgatitur për të ikur nga aty se ishte distanca më e shkurtër me Korfuzin do dilnim me not, ne ishim përgatitur për t’u arratisur me not, ishim shumë të fortë dhe u lamë, pikërisht në datën 7 Janar u lamë në Vlorë. I kemi rënë nga tuneli deri te porti, i kemi rënë me not dhe jemi kthyer mbrapsht. Uji ishte sa të futeshe brenda, nuk kishte problem.
Katerina Trungu: Në Janar.
Agron Hoxhaj: Po dhe kishim një variant tjetër nga Gjirokastra, nga Libohova, gjë që nuk e realizuam dot. Kishte 15 ditë që na ruanin se ditën e fundit që shkuam në Vlorë ne e pamë atë fuksin e degës që e njihnim dhe unë i thashë atij shokut, more këtë e njeh ti se ky po na vjen nga mbrapa? “Jo more ç’ punë ka me ne ky po hajde”. Por ai ishte vërtet dhe ne derisa mbërritëm që do iknim, për Sarandë apo Gjirokastër si ta vendosnim, na arrestuan.
Katerina Trungu: Ama ju nuk është se kishit një fakt, kishin fakte që mund të arratiseshit, mund të gënjeje në atë rast të thoje “jo, nuk po shkojmë?”
Agron Hoxhaj: Ti mund të thoje çfarë të doje, por ai që ishte arrestuar, se ishte arrestuar personi që na nxori ne, ai i kishte thënë të gjitha me detaje, nuk kishte më nevojë për…
Ndërsa kujton të gjithë këtë, Agroni shprehet se pavarësisht çdo gjëje, e ka falur njeriun që e hodhi në mes të ujqërve.
“Patjetër që e kam falur, megjithëse ai kishte marrë dënim maksimal për t’u pushaktuar”, përfundon ai.
/a.r
