Ish-ministri i Jashtëm dhe analisti Besnik Mustafaj ka komentuar sot në News24 në rubrikën “Opinion” disa prej temave të rëndësishme të aktualitetit, duke nisur me delegimin e kompetencave të Ministrit të Jashtëm nga kryeministri Edi Rama tek Gent Cakaj.
Mustafaj tha se nga ana teknike nuk ka asnjë problem por vuri në pikëpyetje të madhe profesionalizmin e zotit Cakaj, aktualisht zv.ministër për Evropën dhe Punët e Jashtme por me kompetenca titullari. Ish-ministër në kohën e Berishës, Mustafaj tha se Cakaj me fjalimin e djeshëm tregoi se është i paaftë dhe i papërgjegjshëm.
“Ishte e pritshme. Që në momentet që Presidenti po denonconte në mënyrë publike ne kemi dëgjuar kreun e grupit parlamentar të PS Taulant Balla i cili ka shpallur se sapo ankimimi i PS të përmbushet në Gjykatën Kushtetuese, Cakaj do bëhet edhe de jure ministër i jashtëm. Kryeministri ka qenë i vendosur në karshillëkun e tij ndaj shumicës absolute të opinionit të shqiptarëve, ndaj shumicës absolute të opinionit politik dhe presidentit, ka qenë i vendosur të çojë në vend idenë e tij. Akti i delegimit të kompetencave nuk përbën problem themelor. Ka ndodhur edhe më parë. Problemi është me dy pjesë. E para është nëse ky ministër ka kapacitetin apo jo ta bëjë realisht punën e ministrit për Evropën e Punët e Jashtme. Unë e shoh si të paaftë për ta bërë.
Edhe fjalimi ishte konfirmim i rezervave që unë dhe shumë të tjerë kemi pasur. Cakaj tha dje në fjalimin e djeshëm se priste që këtu të hiqej nami i keq dhe në fakt ia shtoi.
Ne prisnim të rendiste disa nga sfidat kryesore që ka diplomacia shqiptare. Ne kemi filluar pjesëmarrjen në trojkën e OSBE për të marrë kryesinë e OSBE. Është një gjë që bëhet për herë të parë nga shteti shqiptar.
Gjatë këtij viti dhe vitin tjetër duhet të lobojmë për vendin e përkohshëm për anëtar të KS. Ai nuk foli për asnjë nga këto, as për vendimin e KiE për Shqipërinë. Foli për integrimin rajonal, çfarë nënkupton ai. Ne nuk kemi një proces integrimi rajonal. E vetmja tezë që Cakaj tha dje dhe që nuk ka asnjë kuptim. Ai tregoi se ishte i paaftë dhe i papërgjegjshëm. Në këtë kuptim jam i shqetësuar nga ky delegim”, deklaroi Mustafaj, raporton “BalkanWeb”.
I pyetur nëse duhet të ketë takime diplomatike ku Cakaj nuk duhet të jetë, ish-ministri i Jashtëm mohoi. “Jo nuk ka. Nga ana teknike nuk ka asnjë pengesë që të jetë”, tha ai.
Mustafaj ka bërë dhe një interpretim të deklaratës së Presidentit të Republikës Ilir Meta pasi Cakaj mori detyrën nga Rama.
“Ka shumë marrëveshje që përcaktojnë se kush duhet t’i nënshkruajë. Të gjithë personat e tjerë duhet t’i nënshkruajnë me një mandat të dhënë nga Presidenti. Unë druaj se Presidenti Meta do t’i japë ndonjëherë ndonjë mandat për Cakaj. Por ka shumë pak raste”, tha ai.
Ndërkaq Mustafaj foli dhe për njohjen e shpejtë nga Shqipëria dhe Kosova të presidentit të sapozgjedhur të Venezuelës nga ana e opozitës, ndërkohë që presidenti Maduro vijon të jetë komandant i ushtrisë.
“Venezuela është aktualisht me dy koka. Ka një situatë shumë të ndërlikuar. SHBA dhe një numër vendesh demokratike e kanë njohur presidentin e zgjedhur nga opozita. Rusia ka dalë që mbështet Maduron. Venezuela, një vend i largët nga Europa është bërë një vatër e përplasjeve të dy diplomacive ndërkombëtare. Shqipëria në këtë situatë do të rreshtohej në krahë të SHBA-ve. Jam miratues. Nuk ka kalendar”, deklaroi Mustafaj.
/a.meta
