Kryeministri i Kosovës, Isa Mustafa, ka mbajtur një fjalë rasti në fillim të seancës së Kuvendit të Kosovës. Mustafa ka shprehur keqardhjen dhe dhimbjen për të gjitha viktimat në Bruksel, si pasojë e sulmeve terroriste.
“Ne shprehim interesimin tonë që të jemi pjesë e aleancës globale kundër terrorizmit, që si pasojë po rrezikohet demokracia”, ka deklaruar Mustafa. Ai shton se Kosova ka treguar përkushtimin e saj që të ruaj paqen, që të jetë pjesë e luftës kundër çdo veprimi të keq dhe që të nderoj marrëdhënie të mira ndëretnike dhe ndërfetare.
Mustafa bëri edhe një thirrje ndaj kosovarëve që po marrin pjesë në luftën në Siri.
“Edhe pse në numër të vogël, unë ju bëjë thirrje qytetarëve tanë që po marrin pjesë në luftimet në Siri, që të kthehen në Kosovë dhe të vetëdijësohen për dëmet që mund të shkaktojnë me veprimet e tyre”, ka thënë Mustafa.
Kryeministri i ka siguruar qytetarët se institucionet e Kosovës, si Policia, Ministria e Brendshme dhe AKI-ja po bëjnë punën e tyre për masat e sigurisë në vend.
