Tri partitë opozitare edhe një herë kanë rikonfirmuar qëndrimin e tyre se do ta bllokojnë sërish seancën plenare, ku pritet të miratohet Projektligji për Buxhetin e Kosovës dhe disa pika të tjera.
Ata kanë thënë se do të përdorin të gjitha format e mundshme për ta penguar funksionalizimin e Kuvendit deri në tërheqjen e marrëveshjeve, që ata i quajnë të dëmshme për Kosovën.
Opozitarët nuk e kanë përjashtuar mundësinë edhe të hedhjes së gazit lotsjellës brenda Parlamentit. Lëvizja “Vetëvendosje” thotë se bllokimi i seancës do të ndodhë përderisa nuk tërhiqen. Shqipe Pantina, deputete nga Lëvizja “Vetëvendosje”, ka thënë për gazetën “Zëri” se do të përdorin forma të ndryshme për ta bllokuar këtë seancë.
