Nëse po mendoni se ku të shkoni me pushimet, atëherë mund të merrni në konsideratë Shqipërinë.
Kështu e nis artikullin tabloidi britanik “The Sun”, teksa i referohet një studimi se Shqipëria është ndër destinacionet turistike me rritjen më të shpejtë në Evropë.
Sipas Thomas Cook, rezervimet janë rritur me një shifër marramendëse prej 293%. Dhe kjo nuk është aspak befasuese, pasi Shqipëria ka shumë për të eksploruar, përfshirë plazhe të bukura me ujëra kristal të pastër, një kryeqytet relativisht të qetë dhe verë të lirë.
Përshkrimin për Shqipërinë, “The Sun” e nis me kryeqytetin, Tiranën, ku moti është shumë i mirë dhe turin mund ta nisësh nga sheshi Skënderbej.
“The Sun” shkruan më tej se Shqipëria është gjithashtu vendi i të ashtuquajturave “Maldivet e Evropës”, Ksamili, i cili e ka marrë këtë epitet për shkak të plazheve të bukura, rërës së butë dhe ujërave kristal të pastër.
Por nëse preferoni të eksploroni historinë, Shqipëria ka disa qytete historike shumë të bukura, si Berati dhe Gjirokastra, të cilat janë të dyja site të Trashëgimisë Botërore të UNESCO-s.
Në fund, “The Sun” sugjeron Durrësin, ku gjendet amfiteatri romak, ku mund të shijohet gjithashtu edhe shëtitja në bregun e Adriatikut, ndërsa më tej në Golem për të provuar aktivitete të ndryshme ujore.
Britanikët që duan të vizitojnë këtë vend ende pak të eksploruar, thekson “The Sun”, mund të fluturojnë direkt gjatë verës nga Londra, Birmingham, Manchester, Edinburgh dhe Liverpool.
