Monopatinat, e përdorura së fundi në masë nga të rinjtë, por edhe të mitur, po kthehen çdo ditë e më shumë në burim aksidentesh. Në studion e emisionit ‘Real Story’, analisti Eduard Zaloshnja, u shpreh se nga vjet, sivjet janë dyfishuar viktimat që kanë qenë në përdorim të motoçikletave/ monopatinave.
“Nga vjet, sivjet janë dyfishuar viktimat që kanë qenë në përdorim të motoçikletave dhe me motoçikleta përfshihen të gjitha, mjetet me dy rrota, monopatinat mbi 25 km/h. E ndjek çdo vit, si këtë vit nuk kam parë një dyfishin të motocikletave, dhe po të shohim gjithë viktimat nga vjet në sivjet, thuajse ka ardhur nga motoçikletat”, u shpreh Zaloshnja.
I të njëjtit mendim është edhe ekspert i sigurisë rrugore, Islam Qibini ndërsa nxjerr si problematikë edhe faktin së këto mjete nuk janë të përfshira në Kodin Rrugor.
“Sa i përket monopatinave me një fuqi të caktuar, ky lloj mjeti është futur kohët e fundit kryesisht pas covidit, dhe në shumë vende të BE -së, ende nuk ka një legjislacion për mënyrën si duhen përdorur. Është problem jo vetëm te ne, janë mjete të reja. Në kodin rrugor ky mjet ende nuk është i klasifikuar, hyn si një mjet mes mjetit me pedalë dhe ciklomotorit”, u shpreh Qibini.
Referuar shifrave, Zaloshnja tha se praktikisht 2/3 e atyre që kanë humbur jetën në Shqipëri, janë këmbësorë, biçiklistë, motoçiklistë. Në Evropë, kjo është 20%.
Ndërkohë gazetarja e kronikës në ABC News, Bleona Sari, solli në vëmendje masat ndëshkimore edhe për këmbësorët që u ndërmorën nga policia me qëllim shmangien e aksidenteve, të cilat sipas saj rezultuan të paefektshme.
“Për këmbësorët u morën edhe masa, duke vendosur gjoba. Madje nga drejtoria e rrugores, u tha se kishim mbi 50 masa në një ditë, vetëm për këmbësorët, por kjo nuk dha efekt”, u shpreh ajo.
