Një ngjarje e rëndë ka tronditur Kanadanë, pasi nëntë persona humbën jetën dhe të paktën 25 të tjerë mbetën të plagosur gjatë një sulmi me armë zjarri në komunitetin e vogël Tumbler Ridge, në provincën British Columbia.
Sipas policisë, autori i sulmit vrau nëntë persona përpara se t’i jepte fund jetës së tij brenda një shkolle të mesme lokale. Gjashtë viktima u gjetën të pajeta brenda ambienteve të shkollës, ndërsa një tjetër ndërroi jetë gjatë transportimit për në spital. Trupi i autorit u gjet gjithashtu brenda shkollës dhe dy viktima të tjera u zbuluan në një banesë pranë.
Kryeministri i Kanadasë, Mark Carney, ka pezulluar udhëtimin e planifikuar drejt Gjermanisë, ku pritej të merrte pjesë në Konferencën e Sigurisë në Mynih. Nga zyra e tij është bërë e ditur se prioritet është menaxhimi i situatës dhe mbështetja për komunitetin e prekur.
Kryeministri i British Columbia, David Eby, deklaroi se oficerët e policisë mbërritën në vendngjarje vetëm dy minuta pas thirrjes emergjente, duke theksuar se reagimi i shpejtë mund të ketë parandaluar një tragjedi edhe më të madhe. Ai falënderoi forcat e rendit për guximin dhe profesionalizmin e treguar.
Kryetari i bashkisë së Tumbler Ridge, Darryl Krakouka, tha se komuniteti është shumë i vogël dhe i bashkuar, duke shtuar se “do të njoh çdo viktimë”, pasi ka 19 vite që jeton në atë zonë. “Nuk i quaj banorë, i quaj familje”, u shpreh ai.
Kjo është sulmi i dytë më vdekjeprurës në një shkollë në historinë e Kanadasë, pas masakrës së vitit 1989 në Montreal, ku u vranë 14 persona në École Polytechnique.
Autoritetet kanë bërë thirrje për durim ndërsa hetimet vazhdojnë dhe po kontaktohen familjarët e viktimave. Ndërkohë, mbështetje psikologjike dhe ndihmë emergjente po ofrohen për nxënësit, familjet dhe të gjithë komunitetin e prekur nga kjo tragjedi e rëndë.
