Një “kapitull i ri” ka dalë në pah në Ngushticën e Hormuzit mes “dështimit të turpshëm” të SHBA-së, ka deklaruar udhëheqësi suprem i Iranit.
“Sot, dy muaj pas fushatës dhe agresionit më të madh në rajon dhe dështimit të turpshëm të Amerikës në planin e saj, një kapitull i ri po hapet në Gjirin Persik dhe në Ngushticën e Hormuzit,” tha Mojtaba Khamenei në një deklaratë të shpërndarë nga mediat shtetërore.
Mesazhi u publikua nga agjencia shtetërore e lajmeve IRNA për të përkujtuar Ditën Kombëtare të Gjirit Persik, e cila shënon dëbimin e forcave portugeze nga Ngushtica e Hormuzit në vitin 1622.
Ngushtica e Hormuzit “ka nxitur lakminë e shumë djajve gjatë shekujve të kaluar”, tha Khamenei, duke iu referuar ngjarjeve historike, përfshirë dëbimin e trupave portugeze në vitin 1622.
Por që nga fillimi i luftës SHBA-Izrael kundër Iranit në fund të shkurtit, iranianët “kanë parë me sytë e tyre shfaqjet e bukura të qëndrueshmërisë, vigjilencës dhe luftës guximtare” të forcave iraniane.
Ai pretendoi se “e ardhmja e ndritur e rajonit të Gjirit Persik do të jetë një e ardhme pa Amerikën dhe në shërbim të përparimit, rehatisë dhe mirëqenies së popujve të tij”.
Khamenei fajësoi gjithashtu praninë ushtarake amerikane në Lindjen e Mesme për pasigurinë në rajon, që sipas tij ka ardhur si rezultat i sulmeve SHBA-Izrael ndaj Iranit dhe veprimeve të Teheranit ndaj vendeve në rajon, përcjell A2CNN.
Udhëheqësi suprem i Iranit tha se “është vërtetuar se prania e të huajve amerikanë dhe vendosja e tyre në tokat e Gjirit Persik është faktori më i rëndësishëm i pasigurisë në rajon”.
“Bazat kukulla të Amerikës nuk kanë as forcën dhe as kapacitetin për të garantuar sigurinë e tyre, e lëre më të ketë ndonjë shpresë se Amerika do të sigurojë mbrojtje për aleatët dhe mbështetësit e saj në rajon,” tha ai.
