Një çift ka pranuar se ka vjedhur prodhime nga kompania e mallrave elektronike “Amazon” në vlerën prej më shumë se 1.2 milion dollarë, duke pretenduar vazhdimisht se malli që e kishin porositur ishte dëmtuar gjatë ardhjes me postë.
Erin Joseph Finan, 38-vjeçar dhe Leah Jeanette Finan, 37-vjeçare, të dy nga Indiana e Shteteve të Bashkuara, janë deklaruar të fajshëm për mashtrim postar dhe pastrim parash. Çifti mund të dënohet me gjobë prej 500.000 dollarë, si dhe deri më 20 vjet burg.
Vendimi ndaj tyre do të merret më 9 nëntor. Sipas gazetës lokale, Muncie Star Press, çifti kishte përdorur qindra identitete të rreme online për të porositur pajisje të njohura të teknologjisë në Amazon, përfshirë ora të mençura Samsung, GoPro kamera dhe video lojëra të Xbox.
Më pas, çifti e kishte kontaktuar departamentin për shërbimet e konsumatorit në Amazon për të raportuar se pajisjet kishin mbërritur të dëmtuara dhe se nuk po punin. Amazon u kishte dërguar atyre produkte zëvendësuese falas.
Pas kësaj, çifti i’a shiste pajisjet një individi tjetër, i cili do t’i rishiste ato te një firmë në Nju Jork, emri i së cilës nuk është bërë i ditur. Ata u kapen pas një hetimi te imtesishem nga kompania Amazon dhe policia.
ma.me
